वरिपरि हिमाल, अग्लो पहाडमा गुप्ता दह । रुकुम पूर्वको सिस्ने गाउँपालिका–१ को अग्लो पहाडमै छ अनौठो सानो र ठूलो गुप्ता दह। अग्लो पहाडमा अवस्थित गुप्ता दह हिउँदयाममा गुप्ता दह समेत पूरै हिउँले ढपक्क हुन्छ । लाग्छ यो कुनै कुशल चित्रकारले कोरेको अब्बल चित्र हो । देख्ने जो कोहीलाई लाग्छ सायद धर्तीको स्वर्ग यही हो ।
दहसम्म पुग्न उकालो चढ्दा लाग्छ कि कति गाह्रो, कति अप्ठेरो ! जब दहको किनारमा पुगिन्छ, उकालो चढ्दा उडेको अनुहारमा एकाएक अनुपम आनन्दको रंग भरिन्छ। गुप्ता दहको डिलमा बसेर हेरिरहँदा एकपटक आफैंलाई चिमोटूँ झैं हुन्छ, ‘यो सपना हो कि विपना ।’
यहाँ बसेर दह र दहलाई वरिपरिबाट अँगालोमा बेरेर बसेकाे सिस्ने हिमालको दृश्य देख्दा जसको पनि भनाइ हुने गर्छ, यति सुन्दर रैछ र पो सितिमिति यहाँ हेर्न साइत नजुरेको रैछ । जिल्लाकै प्रख्यात सिस्ने हिमालको छायाँ गुप्ता दहमै टलक्क टल्किने गर्दछ । त्यसले झनै दहको सुन्दरता बढाएकाे छ । यसले सबैकाे मनमा आनन्द ल्याउँछ ।
आन्तरिक तथा बाह्य पर्यटकको गन्तव्य हो, गुप्ता दह । तर भाैगाेलिक विकटताका कारण यसकाे प्रचार र पर्यटककाे राेजाइमा पुग्न सकेकाे छैन् । याे जिल्लाकै सबैभन्दा उचाइमा रहेको ठूलो बाह्रैमासे दह हो । चलिरहने हावाको वेगले लहरिने पानीको छालले तपाईंलाई रोमाञ्चक तुल्याउनेछ र यी दृश्यमा एकाकार भईरहँदा तपाईंले आफैंलाई भुल्नुहुनेछ ।
न घर सम्झनु हुनेछ, न भाइबन्धु । न धन सम्पत्ती न ऋणभार । न सुख, सयल, न दुःख, कष्ट । सबैकुरा भुल्नुहुनेछ। अनि यो मोहक जलकुण्डको सौन्दर्यमा एकोहोरिनुहुनेछ । अनि सेता टलक्क टल्कने सिस्ने हिमालले सबैको मन तान्छ । जिल्लाको प्रमुख गन्तव्य हो यो । यो यात्रामा एकै पटक दुई पर्यटकीय स्थलको अवलोकन गर्न सकिन्छ । तपाई पनि पुग्ने होइन त गुप्ता दह ?
फाेटाेः दिलचन पुन
