रुकुम पश्चिमको जिल्ला सदरमुकाममा रहेका ८ वटा मासु पसल बन्द गरिएको छ । आज मुसीकोट नगरपालिका वडा नम्वर १ मा रहेका मासु पसलहरु बन्द गरिएको हो । मापदण्ड नपुगेका मासु पसल जिल्ला स्तरिय अनुगमन टोलीले बन्द गरेको छ । 

सदरमुकाममा रहेका १७ वटा मासु पसलको अनुगमन गरिएको थियो । यो भन्दा पहिला अनुगमन गरिएको समयमा मापदण्डमा आउन आग्रह गर्दा पनि मापदण्डमा नआएका मासु पसलहरु बन्द गरिएको सहायक प्रमुख जिल्ला अधिकारी प्रवेश बडुवालले जानकारी दिनुभयो । 

“अनुगमनको क्रममा पटक–पटक मापदण्डमा आउन भनियो तर सधै अटेरी गरेको पाइए पछि हामीले पसल बन्द गराएका हौं ।” सहायक प्रमुख जिल्ला अधिकारी बडुवालले भन्नुभयो । अव मापदण्डमा आए पछि मात्र मासु पसलहरु खोल्न दिइने उहाँको भनाई छ । दर्ता नगरेका, मासु पसल र अन्य पसल एकै ठाउँबाट संचालन भएको, सरसफाईमा ध्यान नदिएको जस्ता कैफियतहरु पटक–पटक भेटिने गरेको छ । 

मासु पसलले स्वस्थ र सफा मासु बेच्नु पर्ने पशु अस्पताल तथा पशु सेवा कार्यालयका निमिक्त कार्यालय प्रमुख ज्ञाणुकुमार गौतमले बताउनुभयो । तर रुकुम पश्चिमको जिल्ला सदरमुकाममा रहेका मासु पसलमा भने निकै लापर्बाही भएको पाईएको उहाँको भनाई छ । 

उपभोक्तबाट मासु पसलहरुमा निकै लापर्बाहि भएको भन्ने गुनासो बढ्दै गए पछि विभिन्न समयमा अनुगमन हुने गरेको छ । अघिल्ला पटक गरिएका अनुगमनमा सुझाव दिने गरिएको भए पनि यो पटक भने मापदण्ड विपरितका पसलहरु बन्द नै गरिएको हो ।