राष्ट्रिय स्वतन्त्र पार्टी (रास्वपा) ले रुकुम पश्चिममा पनि पार्टी सभापति रवि लामिछानेमाथि राजनीतिक प्रतिशोध साँधिएको भन्दै त्यसका विरुद्धको हस्ताक्षर अभियान सञ्चालन गर्ने भएको छ । साउन २ गतेबाट जिल्ला भरमा हस्ताक्षर अभियान सञ्चालन हुने रास्वपा रुकुम पश्चिमले जनाएको छ । जिल्लाका सबै ६ वटै पालिकाका वडासम्मै हस्ताक्षर अभियान सञ्चालन हुने रास्वपा रुकुम पश्चिमका सभापति मानबहादुर शाहीले जानकारी दिनुभयो ।

अन्य ठाउँमा १ साता हस्ताक्षर अभियान सञ्चालन हुने र सदरमुकाममा भने २, ३ सातासम्म अभियान सञ्चालन हुने उहाँले बताउनुभयो । जिल्लाबाट करिब ३० हजार हस्ताक्षर सङ्कलन गर्ने लक्ष राखिएको उहाँको भनाई छ । रास्वपाले पार्टी स्थापना दिवसका अवसरमा असार ७ गते काठमाडौँको माइतीघरमा एक कार्यक्रमको आयोजना गर्दै पार्टी सभापति लामिछानेमाथि राजनीतिक प्रतिशोध साँधिएको भन्दै हस्ताक्षर अभियान सुरु गरेको थियो ।

तर जिल्लासम्म त्यो अभियान पुग्न सकेको थिएन । जिल्लाको चौरजहारीमा केही दिन हस्ताक्षर अभियान सञ्चालन गरिए पनि रास्वपाले जिल्ला भरमा भने साउन २ गतेबाट अभियान चलाउन लागेको हो । यसका लागि खटिने टोली तयार पारिरहेको रास्वपा रुकुम पश्चिमले जनाएको छ । रास्वपा सभापति सहकारी ठगी मुद्दामा कारागारमा रहनुभएको छ । यसलाई रास्वपाले राजनीतिक प्रतिशोधका रूपमा अर्थ्याउँदै आएको छ ।