नेपालको आगामी टी-२० विश्वकप २०२६ यात्रा सपनाबाट सम्भावनासम्मको संघर्षपूर्ण कथा नेपाली क्रिकेट आज केवल खेल मात्र रहेन, यो राष्ट्रिय गौरव, युवा सपना र विश्व मञ्चमा पहिचानको प्रतीक बनेको छ। यही गौरवको अर्को अध्याय हो- आइसिसी पुरुष टी-२० विश्वकप २०२६ मा नेपालको सहभागिता। सीमित स्रोत, कठिन संघर्ष र अथक मेहनतका बिच नेपालले फेरि एक पटक विश्व क्रिकेटको ठुला राष्ट्रहरूसँग प्रतिस्पर्धा गर्न पाएको छ ।

विश्वकपसम्मको बाटो

नेपालको विश्वकप यात्रा सजिलो थिएन। एसिया- इस्ट एसिया प्यासिफिक (EAP) क्षेत्रीय छनोट प्रतियोगितामा लगातार दबाबपूर्ण खेलहरू खेलेर, अनुभवी र उदीयमान खेलाडीहरूको संयोजनले नेपालले आफूलाई विश्वकपका लागि योग्य साबित गर्‍यो। यो सफलता केवल स्कोर बोर्डको नतिजा होइन, वर्षौँदेखिको लगन, घरेलु क्रिकेटको विकास र समर्थकहरूको विश्वासको परिणाम हो ।

समूह चरणको चुनौती
टी-२० विश्वकप २०२६ मा नेपाल एक अत्यन्तै चुनौतीपूर्ण समूहमा परेको छ। इङ्गल्यान्ड, वेस्ट इन्डिज, बङ्गलादेशजस्ता विश्व स्तरीय टोलीहरूसँग प्रतिस्पर्धा गर्नु आफैँमा ठुलो अवसर हो । यी खेलहरू भारतको ऐतिहासिक क्रिकेट रङ्गशालामा हुनेछन्, जहाँ लाखौँ दर्शकबिच नेपाली खेलाडीहरूले आफ्नो क्षमता प्रमाणित गर्नेछन् ।

अवसर र अपेक्षा
नेपालका लागि यो विश्वकप जित्नेभन्दा पनि आफ्नो खेल स्तर प्रमाणित गर्ने अवसर हो । अनुशासित बलिङ, निर्भीक ब्याटिङ र उत्कृष्ट फिल्डिङ मार्फत नेपालले कुनै पनि ठुला टोलीलाई चुनौती दिन सक्छ भन्ने अघिल्ला प्रतियोगिताले देखाइसकेको छ। एक-दुई अप्रत्याशित जितले नेपाललाई नयाँ उचाइमा पुर्‍याउन सक्छ ।

युवा पुस्ताको प्रेरणा
यो विश्वकपले नेपाली युवाहरूलाई ठुलो सन्देश दिन्छ । संघर्षबाट सम्भावना जन्मिन्छ । गल्ली क्रिकेटदेखि विश्वकपको मञ्चसम्मको यात्रा सम्भव छ भन्ने उदाहरण वर्तमान नेपाली टोलीले दिएको छ । यही कारण, नेपालको सहभागिता खेलभन्दा बाहिर पनि सामाजिक र सांस्कृतिक महत्त्व बोकेको छ ।

समर्थकहरूको भूमिका
नेपालको क्रिकेट समर्थक विश्वमै फरक पहिचान राख्छ। मैदान होस् या सामाजिक सञ्जाल, नेपाली समर्थकहरूको उत्साह खेलाडीहरूको थप ऊर्जा हो । टी-२० विश्वकप २०२६ मा पनि यही समर्थन नेपालका लागि सबैभन्दा ठुलो शक्ति बन्नेछ ।

लेखक जिल्ला क्रिकेट संघ रूकुम पश्चिमका काेषाध्यक्ष हुनुहुन्छ ।