रसुवाको भोटेकोशी नदीमा आएको भीषण बाढीका कारण प्रभावित नागरिकहरूको राहत तथा मानवीय सहयोगका लागि रुकुमेली समाज विकास केन्द्रले आर्थिक सहयोग संकलन अभियान सुरु गरेको छ । केन्द्रले संस्थाका पूर्व सल्लाहकार, कार्यसमितिका पदाधिकारी तथा सदस्यहरू र संस्थामा कार्यरत सम्पूर्ण कर्मचारीहरूबाट स्वेच्छिक रूपमा सहयोग संकलन गर्ने जनाएको छ । अभियानमार्फत १ लाख ५० हजार रुपैयाँ सहयोग रकम संकलन गर्ने लक्ष्य राखिएको रुकुमे समाज विकास केन्द्रका कार्यकारी निर्देशक नरेन्द्र ओलीले जानकारी दिनुभयो ।

बाढीका कारण ठूलो जनधनको क्षति, केही व्यक्तिको मृत्यु तथा बेपत्ता भएको र अर्बौं रुपैयाँ बराबरको भौतिक संरचनामा क्षति पुगेकाले सहयोग संकलन  गर्न लागिएको केन्द्रका अध्यक्ष केशनकुमार क्षेत्रीयालले जानकारी दिनुभयो । संकलित रकम नेपाल सरकारको प्रधानमन्त्री दैवी प्रकोप उद्धार कोषमा जम्मा गरिने  छ ।

केन्द्रले प्राकृतिक विपत्तिबाट पीडित परिवारप्रति गहिरो समवेदना व्यक्त गर्दै सबैलाई मानवीय सहयोगमा हातेमालो गर्न आग्रह गरेको छ । भोटेकोशी क्षेत्रमा आएको बाढीपछि विभिन्न सरकारी तथा गैरसरकारी निकायहरूले समेत प्रभावित नागरिकका लागि राहत तथा उद्धार सहयोगको अपिल गरिरहेका छन् ।