ट्राफिक कारबाहीबाट साढे २६ लाख राजश्व संकलन

समाज

Home
समाज
ट्राफिक कारबाहीबाट साढे २६ लाख राजश्व संकलन

ट्राफिक कारबाहीबाट साढे २६ लाख राजश्व संकलन

कखरा संवाददाता बुधबार, साउन ४, २०७९

रुकुम पश्चिममा ट्राफिक कारबाहीबाट एक वर्षमा साढे २६ लाख राजश्व संकलन भएको छ । जिल्लामा ट्राफिक कारबाही पनि बढ्दो क्रममा रहेको छ । वितेको आर्थिक वर्ष २०७८/०७९ मा विभिन्न सवारी साधानलाई कारवाही गर्दा २६ लाख २८ हजार राजश्व उठेको जिल्ला ट्राफिक प्रहरी कार्यालयले जनाएको छ । कार्यालयका अनुसार १ वर्षमा कुल २ हजार ७ सय ५ वटा सवारी साधन कारवाहीमा परेका छन् । जसमा सबैभन्दा बढी मोटरसाईकल रहेका छन् । राजश्व पनि सबै भन्दा बढी मोटरसाईकलबाट उठेको छ । १ हजार ५ सय ९३ वटा मोटरसाईकल कारबाहीबाट १५ लाख ४४ हजार राजश्व उठेको छ ।

३ सय २९ वटा वसलाई कारवाही गरिएको छ । जसबाट ३ लाख २२ हजार जरिवाना उठेको छ । त्यस्तै २ सय ५ वटा ट्रक कारबाहीबाट २ लाख १ हजार, २ सय ६९ वटा ट्याक्टर कारबाहीबाट २ लाख ६१ हजार र ३ सय ९ वटा जीप कारबाहीमा पर्दा ३ लाख राजश्व उठेको जिल्ला ट्राफिक प्रहरी कार्यालयका प्रमुख प्रहरी सहायक निरीक्षक मीनबहादुर क्षेत्रीले जानकारी दिनुभयो । ट्राफिक नियम उल्लंघन गर्ने सवारी साधनलाई कारबाही गरिएको उहाँले बताउनुभयो । जिल्लामा ट्राफिक कारबाहीमा पर्ने सवारी साधनको संख्या बढ्दै गएको छ । यसले राजश्वलाई पनि बढाईरहेको छ ।

आर्थिक वर्ष २०७७/०७८ मा जम्मा १ हजार ७ सय १६ वटा सवारी साधन मात्र कारबाहीमा परेका थिए । जसबाट १७ लाख १० हजार राजश्व उठेको थियो । १ वर्षको अवधिमा जिल्लामा सवारी कारबाही ९ सय ८९ वटाले बढेको छ । राजश्वमा ९ लाख १८ हजारले वृद्धि भएको जिल्ला ट्राफिक प्रहरी कार्यालयको तथ्यांकले देखाएको छ । रुट परमिट नभएका, क्षमता भन्दा बढी यात्रु तथा सामान बोक्ने, आवश्यक कागजात नबोक्ने, तिव्र गतिमा सवारी चलाउने जस्ता गल्ति गर्ने सवारी साधन कारबाहीमा पर्ने गरेको ट्राफिक प्रहरी प्रमुख केसीको भनाई छ ।

प्रकाशित मिति: बुधबार, साउन ४, २०७९ १५:२७