रुकुम पूर्वको रुकुमकोटमा आयोजित भलिबलको उपाधि होटल लेक सिटीले जितेको छ । सिस्ने गाउँपालिका वडा नम्बर ५ र ६ को आर्थिक सहयोग तथा संयुक्त रुकुमकोट खेलकुद समिति रुकुम पूर्वको आयोजनामा छिप्रिदहमा संचालित खुल्ला पुरुष भलिबल प्रतियोगिताको फाइनलमा बागलुङको निसिखाेलालाई पराजित गर्दै रुकुमकोटको होटल लेक सिटीले उपाधि जितेको हो ।

लेक सिटी ३–० ले विजयी भयो । लेक सिटीले नगद १ लाख २५ हजार रुपैयाँ सहित कप, मेडल र प्रमाणपत्र प्राप्त गरेको छ । यस्तै उपविजेता निसिखोला बागलुङले नगद ८० हजार रुपैयाँको साथमा कप, मेडल र प्रमाणपत्र हात पारेको छ । तेस्रो भएको रुकुमेली पशुपंक्षी फर्मले नगद ४० हजार रुपैयाँ, कप मेडल र प्रमाणपत्र पाउँदा शान्त्वना भएको पुथाउत्तरगंगा गाउँपालिका ८ चारगाउँले नगद २० हजारको रुपैयाँ, मेडल र प्रमाणपत्र पाएको छ । प्रतियोगितामा रुकुम, रोल्पा र बागलुङका गरी १४ टिमले प्रतिस्पर्धा गरेको आयोजकले जनाएको छ । 

यस्तै पुरुष डबल व्याडमिन्टन प्रतियोगिता पनि आयोजना गरिएको थियो । ब्याडमिन्टनमा प्रकाश बुढा मगर र भानु सुनारको जोडी पहिलो भएको छ । फाइनलमा डम्मर थापा र इश्वर रावलको जोडीलाई पराजित गर्दै प्रकाश र भानुको जोडी पहिलो भएको हो ।  प्रथम हुने जोडीले नगद २० हजारको साथमा कप, मेडल र प्रमाणपत्र प्राप्त गरेको छ  ।

दोस्रो भएको डम्मर र इश्वरको जोडीले नगद १५ हजार, मेडल र प्रमाणपत्र पाउँदा सेमिफाइनल पुगेको   सोहेल क्षेष्ठ र मदन बिसी तथा महेन्द्र पुन र कबिन्द्र पुनको जोडीले समान  ५/५ हजार, मेडल र प्रमाण–पत्र हात पारेको खेलकुद विकास समितिका अध्यक्ष रोशन मल्लले जानकारी दिनुभयो ।