लुम्बिनी प्रदेशका सभामुख तुलाराम घर्ती मगरले प्रदेशकै विकास निर्माणले पछि रहेको रुकुमपूर्वको विकासका निम्ति प्रदेश सरकारको पहिलो प्राथमिकतामा रहेको बताउनुभयो । मङ्गलबार सिस्ने गाउँपालिका स्तरीय चौँथो राष्ट्रपति रनिङ शिल्ड उद्घाटन कार्यक्रमलाई सम्बोधन गर्दै सभामुख घर्ती मगरले यस्तो बताउनु भएको हो । 

नयाँ जिल्ला भएकाले धेरै काम अझै सुरु गर्नु पर्ने अवस्थामा रहेकोले समग्र शिक्षा, स्वास्थ्य, खानेपानी, सञ्चार यातायात, पर्यटन लगायत सर्वागिङ्ण विकासमा लुम्बिनी प्रदेशको ध्यान रहेको सभामुख घर्ती मगरले बताउनुभयो । अहिलेको अवस्थामा विकास निर्माणको हिसाबले विकट रहेता पनि जिल्लाबासीको जीवनस्तर उकास्नमा ठूलो सम्भावना रहेको सभामुख घर्ती मगरले बताउनुभयो । 

विकासका आधार तयार गर्न सकिएमा प्रदेशकै नमुना जिल्लाको रूपमा विकास हुने बताउनभयोे । किनभने कला, संस्कार, संस्कृति, प्रशस्त मात्राका तालतलैया, हिमाल, कृषिमा अर्गानिक उत्पादन यी क्षेत्रको विकासका लागि सरकारले पहिलो प्राथमिकतामा राखेर काम गरिराखेको उहाँले बताउनुभयो । यस क्षेत्रमा विकासले फट्को मार्न सकेमा प्रदेशकै विकसित जिल्लाको रूपमा अग्रसर हुने बताउनुभयो । 

यसैगरी खेलकुद पनि देशको एउटा अंङ्ग भएको बताउनु भएको छ । राष्ट्रको चिनारी खेल जगत भएको हुँदा नयाँ खेलाडि उत्पादन तथा व्यवस्थापन गर्न सरकारले ध्यान दिनु पर्ने बताउनुभयो । खेलाडि र खेलको चौतरफी विकासको लागि तीन तहका सरकारले ध्यान दिन आवश्यक रहेको बताउनुभयो । भौगोलिक विकटता कारण जिल्लामा मापदण्ड अनुसारको खेल मैदान निर्माण हुन नसक्दा खेलाडि उत्पादन गर्न चुनौती रहेको सभामुख घर्ती मगरले बताउनुभयो । खेल क्षेत्रको विकासका निम्ति आफ्नो तर्फबाट पहल कदमी लिइराख्ने घर्ती मगरको भनाइ रहेको छ । 

मङ््गलबार देखि सिस्ने–५ मा रहेको रुक्मिणी माविको प्राङ्गणमा शिल्डको विविध विधाका खेल चलिरहेको छ । गाउँपालिकाका नौ सामुदायिक र एक निजी गरी १० मावि बीच शिल्डमा प्रतिस्पर्धा भइरहेको गाउँपालिका शिक्षा शाखाका प्रमुख मङ्गलसिंह बुढाले बताउनुभयो । 

सिस्ने गाउँपालिकाका अध्यक्ष कृृष्ण रेग्मीको अध्यक्षतामा शिल्ड उद्घाटन गरिएको हो । प्रमुख अतिथिमा लुम्बिनी प्रदेश सभाका सभामुख तुलाराम घर्ती मगर, विशेष अतिथिमा लुम्बिनी प्रदेश सभाका सदस्यहरू सुरुल पुन मगर, दिलकुमारी बुढा मगर, सरिता पुन मगर, जिल्ला समन्वय समितिका प्रमुख मेघबहादुर श्रेष्ठको रहेकोमा विभिन्न राजनीतिक दलका प्रमुख एवम् प्रतिनिधि, प्रमुख जिल्ला अधिकारी, सुरक्षा निकायका प्रमुख लगायतको आतिथ्यता रहेकोमा कार्यक्रमको सञ्चालन शिक्षक हरिबहादुर थापाले गर्नु भएको थियो ।