रुकुम पश्चिमको मुसिकोट नगरपालिका वडा नम्बर १ भलखाेलामा विविध खेलकुद प्रतियोगिता उद्घाटन भएको छ । आइतबार एक कार्यक्रमबम बिच खेलकुद प्रतियोगिताको उद्घाटन गरिएको हो । मुसिकोट नगरपालिकाका प्रमुख महेन्द्र केसीले प्रतियोगिताको उद्घाटन गर्नुभयो । हरेक वर्ष चैते दशैंको अवसरमा वडा नम्बर १ काे भलखोलामा मेला लाग्ने गर्दछ । उक्त मेलाको अवसरमा यो वर्ष पनि विविध खेलकुद प्रतियोगिता आयोजना गरिएको हो ।
मेलाको अवसरमा वडा स्तरीय महिला, पुरुष भलिबल तथा रस्साकस्सी लोक दोहोरी, एकल नृत्य, घैंटो फोर, भाले तान्ने लगायतका प्रतियोगिता आयोजना गरिएको खेलकुद समितिका अध्यक्ष प्रताप मल्लले जानकारी दिनुभयो । पुरुष भलिबल तर्फ प्रथम हुने टिमले ५५ हजार पाँच सय ५५ रुपैयाँ, द्वितिय हुने टिमले ३३ हजार तीन सय ३३ रुपैयाँ र तृतीय हुने टिमले २२ हजार दुई सय २२ रुपैयाँको साथमा मेडल र प्रमाण पत्र प्राप्त गर्ने छन् । यस्तै महिला भलिबल तर्फ प्रथम दोस्रो र तेस्रोलाई क्रमशः दश हजार, ६ हजार र चार हजार रुपैयाँको साथमा मेडल र प्रमाण पत्र प्रदान गरिने आयोजकले जानकारी दिएको छ ।
यस्तै रस्साकस्सी तर्फ महिला, पुरुषको पुरस्कार बराबर रहेको आयोजकले जनाएको छ । प्रथम दोस्रो र तेस्रो लाई क्रमशः २ हजार, १ हजार २ सय र १ हजार साथमा मेडल, प्रमाण पत्र वितरण गरिने छ । यस्तै घैंटो फोरको लागि एक हजार पाँच सय र एकल नृत्यको लागि एक हजार पुरस्कार तोकिएको मेला व्यवस्थापन समितिले जानकारी दिएको छ । मेला व्यवस्थापन समितका अनुसार मेलामा विभिन्न झाँकी प्रदर्शन गर्ने समुहलाई पनि पुरस्कार व्यवस्था गरिएको छ ।
मेला व्यवस्थापन समिति अध्यक्ष भद्र मल्ल अध्यक्षतामा भएको उद्घाटन कार्यक्रममा मुसिकोट नगरपालिकाका प्रमुख महेन्द्र केसी, उप प्रमुख बिमलकुमार पुन, १ नम्बर वडा अध्यक्ष ज्ञानुचन्द्र चन्द, २ नम्बर वडा अध्यक्ष दिनेश खड्का, ३ नम्बर वडा अध्यक्ष दशरथ केसी, ५ नम्बर वडा अध्यक्ष समिरजंग मल्ल, ८ नम्बर वडा अध्यक्ष जयबहादुर थापा लगायतको उपस्थिति रहेको थियो । मेला व्यवस्थापन समितिका सचिव विष्णु चन्दको स्वागत मन्तव्य रहेको कार्यक्रमको संचालन रूपेश भण्डारीले गर्नुभएको थियो ।
