कर्णाली प्रदेशका स्थानीय तहमा कार्यरत रोजगार सेवामा कार्यरत कर्मचारीहरूको हकहितमा काम गर्ने भन्दै कर्णाली प्रदेश रोजगार सेवा केन्द्र कर्मचारी हकहित मञ्च गठन गरिएको छ । रोजगार सेवामा कार्यरत कर्मचारीहरूको भेलाले मञ्चको तदर्थ समिति गठन गरेको छ । भर्चुअल भेलाबाट सुर्खेतमा कार्यरत प्रकाश पौडेलको संयोजकत्वमा १२ सदस्यीय समिति गठन गरिएको हो । जसको सह संयोजकमा सुर्खेतमै कार्यरत हरिबहादुर बुढा र सचिवमा दैलेखमा कार्यरत नवराज थापा चयन हुनुभएको छ ।

सदस्यमा डोल्पाका सुकबिर रोकाय, जाजरकोटका दीपेन्द्रकुमार राना, सल्यानका जीवन शर्मा, जुम्लाका हरिकृष्ण चौलागाई, कालिकोटका रेसम शाही, मुगुका नेत्रराज बुढा, हुम्लाका वीरबहादुर थापा र रुकुम पश्चिमका कृष्णप्रसाद शर्मा रहनुभएको छ । भेलाले पौष १ गते पायक पर्ने ठाउँमा भेला भएर थप छलफल गर्ने निर्णय समेत गरेको छ ।