क्रान्तिकारी कम्युनिस्ट पार्टी नेपाल निकट विद्यार्थी सङ्गठन अखिल क्रान्तिकारी केन्द्रीय समितिले जाजरकोटको रामीडाँडामा २० वटा अस्थायी आवास निर्माण गरेको छ । उक्त क्षेत्रमा गत कात्तिक १७ गते राती केन्द्र विन्दु बनाएर ६ दशमलव ४ रेक्टर स्केलको भूकम्प गएको थियो । सोही ठाउँका स्थानीयलाई लक्षित गरेर रामीडाँडामा अस्थायी आवास निर्माण गरिएको अखिल क्रान्तिकारी केन्द्रीय कार्य समितिले जनाएको छ ।

भूकम्प प्रभावित क्षेत्रमा विद्यार्थी सङ्गठनले सकेको सहयोग गरेको अखिल क्रान्तिकारीका केन्द्रीय सदस्य सोमपाल कामीले जानकारी दिनुभयो । उहाँका अनुसार सङ्गठनले २० वटा अस्थायी आवास निर्माण, भूकम्पले क्षति पुर्‍याएका ११ वटा घरहरू भत्काउने, पुरिएका सामान निकाल्ने लगायतका काम गरेको हो । त्यस्तै सोही ठाउँका दुईवटा सामुदायिक विद्यालयका एक सय बालबालिकालाई न्यानो कपडा वितरण गरिएको उहाँले जानकारी दिनुभयो ।

चिसो समयमा विद्यार्थीलाई पढाई बाट वञ्चित हुन नपरोस् र बिरामी हुनबाट जोगाउन सकियोस् भन्ने उद्देश्यले करिब ७५ हजार बराबरको न्यानो कपडा वितरण गरिएको केन्द्रीय सदस्य कामीले जानकारी दिनुभयो । विद्यार्थी सङ्गठनका गडक प्रदेश संयोजक प्रेमप्रशान्त बोहरा, सङ्गठनका केन्द्रीय पदाधिकारीहरूको समूहले भूकम्प प्रभावित क्षेत्रमा २० दिन श्रमदान गरेको अखिल क्रान्तिकारीका केन्द्रीय सदस्य कामीले जानकारी दिनुभयो ।