रुकुम पश्चिमको मुसिकोट नगरपालिका भित्रका शिक्षकहरूका बिचमा विभिन्न खेलकुद प्रतियोगिता सहित विभिन्न कार्यक्रम हुने भएका छन् । नेपाल शिक्षक महासंघ रुकुम पश्चिम मुसिकोट नगर समितिले विभिन्न कार्यक्रम आयोजना गरेको छ ।
शिक्षकहरू बिचमा भलिबल महिला पुरुष, ब्याडमिन्टन पुरुष, रस्साकस्सी र हाजिर जवाफ प्रतियोगिता आयोजना गरिएको छ । भलिबल पुरुष तर्फको प्रथम टिमले ३० हजार, द्वितीयले २० हजार र तृतीय टिमले १० हजार तथा महिला तर्फको प्रथमले १५ हजार, द्वितीयले १० हजार र तृतीयले ७ पुरस्कार पाउने आयोजकले जनाएको छ ।
त्यस्तै पुरुष डबल ब्याडमिन्टनमा प्रथमले २० हजार, द्वितीयले १५ हजार र सान्त्वना दुई जोडीले ५÷५ हजार पुरस्कार पाउने छन् । रस्साकस्सीमा प्रथमले १० हजार, द्वितीयले ७ हजार र तृतीयले ५ हजार तथा हाजिर जवाफमा प्रथम हुने टिमले १५ हजार, द्वितीयले १० हजार र तृतीयले ५ हजार पुरस्कार पाउने बताइएको छ ।
यो कार्यक्रम मुसिकोट नगरपालिका वडा नम्बर १ को सरस्वती मावि सल्लेमा सञ्चालन हुने छ । शिक्षा दिवस २०८२ को अवसरमा मुसिकोट नगरपालिका भित्रका शिक्षकहरूका बिचमा मैत्रीपूर्ण कार्यक्रम आयोजना गरिएको नेपाल शिक्षक महासंघ मुसिकोट नगर समिति अध्यक्ष यज्ञबहादुर खड्काले जानकारी दिनुभयो ।
यो कार्यक्रमले शिक्षकहरूका बिचमा मैत्रीपूर्ण तथा भाइचाराको सम्बन्ध स्थापित गर्ने र समग्र शैक्षिक उन्नयनमा टेवा पुर्याउने विश्वास गरिएको उहाँले बताउनुभयो । कार्यक्रमलाई भव्य रूपमा सफल पार्न सबैसामु अनुरोध समेत गरिएको छ । महासङ्घले गत वर्ष पनि सोही विद्यालयमा खेलकुद सहित विभिन्न कार्यक्रम सञ्चालन गरेको थियो ।
