रुकुम पश्चिमका सरोकारवालाहरूले जिम्मेवार पत्रकारितामा जोड दिएका छन् । राज्यको चौथो अङ्गका रूपमा चिनिएको पत्रकारिता क्षेत्र जिम्मेवार बनेमा मात्र समाज सही रूपमा अघि बढ्ने सरोकारवालाहरूले बताएका छन् । 

नेपाल पत्रकार महासङ्घको ६९ औँ स्थापना दिवसको अवसरमा नेपाल पत्रकार महासंघ रुकुम पश्चिमले सदरमुकाम मुसिकोटमा आयोजना गरेको कार्यक्रममा उपस्थित सरोकारवालाहरूले हरेक क्षेत्रमा पत्रकारको निगरानी आवश्यक रहेकामा जोड दिएका हुन् । पत्रकारको सही निगरानीले मात्र सुशासन र विधिको शासन कायम हुने उनीहरूको भनाई थियो । 

जिल्ला न्यायाधीश रामप्रसाद बस्यालले पत्रकारले वाच डकको भूमिकालाई अझै बढाउनुपर्ने बताउनुभयो । साथै उहाँले न्याय सम्पादनका विषयमा पत्रकारहरूले समाजलाई सुसूचित गर्न आवश्यक रहेको बताउनुभयो । न्याय सम्पादनको प्रक्रियाका बारेमा जानकारी नहुँदा अन्यौलता देखिएको बताउँदै उहाँले यसमा भूमिका खेल्न पत्रकारहरूलाई आग्रह समेत गर्नुभयो । 

जिल्ला समन्वय समितिका कार्यवाहक प्रमुख देवबहादुर विकले पत्रकार र मिडियाले समाजमा पुर्‍याएको योगदानको प्रशंसा गर्नुभयो । विकास निर्माण, अनियमितता देखि सेवा प्रवाहका सम्बन्धमा पत्रकारले कलम चलाएर समाजमा योगदान गरिरहेको उहाँको भनाई थियो । 

मुसिकोट नगरपालिकाका प्रमुख महेन्द्र केसीले पत्रकारको क्षमता विकास र मिडियाको संस्थागत विकासका लागि मुसिकोट नगरपालिकाले ध्यान दिएको बताउनुभयो । आठबिसकोट नगरपालिकाका प्रमुख रवि केसीले पनि मिडिया र पत्रकारको हितका लागि आफ्नो पालिका गम्भीर रहेको बताउनुभयो ।   

प्रमुख जिल्ला अधिकारी हरिप्रसाद पन्तले पत्रकार समयानुकुल अपडेट हुँदै जानुपर्ने सुझाव राख्नुभएको थियो । समय परिवर्तनशील रहेको र मिडियाको स्वरूप पनि सोही अनुसार परिवर्तन भइरहेकोले पत्रकारहरू दिन प्रति दिन अपडेट हुँदै जानुपर्नेमा जोड दिनुभयो । 

कार्यक्रममा जिल्लास्थित सुरक्षा निकायका प्रमुख, जनप्रतिनिधि, सरकारी तथा गैरसरकारी निकायका प्रमुख तथा प्रतिनिधि, विभिन्न पत्रकार सङ्घ सङ्गठनका प्रमुख तथा प्रतिनिधि, विभिन्न मिडियामा कार्यरत पत्रकार लगायतको सहभागिता रहेको थियो । 

नेपाल पत्रकार महासङ्घका अध्यक्ष लक्ष्मण केसीको अध्यक्षतामा भएको कार्यक्रममा उपाध्यक्ष गोपाल रेग्मीले स्वागत मन्तव्य राख्नुभएको थियो भने सञ्चालन सह सचिव नारायण ओलीले गर्नुभएको थियो ।