रुकुम पश्चिमको चौरजहारी नगरपालिका वडा नम्बर ११ चौफा बजारमा काग तिहार विशेष मेला लाग्ने भएको छ । मेलाका अवसरमा विविध खेलकुद सहित अन्य कार्यक्रमको आयोजना गरिएको छ । 

मेलामा खुला वडा स्तरीय पुरुष भलिबल, बुद्धिचाल (चेस) सहित लोकदोहोरी लगायतका कार्यक्रम आयोजना गरिएको छ । भलिबलको विजेताले १ लाख नगद पुरस्कार पाउने आयोजक मेला व्यवस्थापन समितिले जनाएको छ । 

भलिबलमा उप विजेताले ५० हजार नगद पुरस्कार पाउँदा सान्त्वना हुने २ टिमले समान २० हजार पुरस्कार पाउने आयोजक समितिका खेलकुद संयोजक विवेक ओलीले जानकारी दिनुभयो । ट्रफि, मेडल र प्रमाण पत्रको समेत व्यवस्था रहेको छ । 

दर्ता शुल्क ७ हजार तोकिएको छ । बुद्धिचालमा प्रथमले ५ हजार द्वितीयले ३ हजार र तृतीयले २ हजार नगद पुरस्कार पाउने छन् । यसको दर्ता शुल्क ५ सय रहेको छ । स्थान प्राप्त गर्नेलाई प्रमाण पत्रको समेत व्यवस्था रहेको छ । 

लोकदोहोरीमा प्रथम, द्वितीय र तृतीयले क्रमशः ४ हजार, ३ हजार र २ हजार नगद प्राप्त गर्ने छन् भने दर्ता शुल्क २ हजार रहेको छ । साथै मेला उद्घाटनको दिन सहभागी सबै झाँकीहरू मयुर नाच, सिंगारु नाच, आमा समूह र अन्य नाचलाई पनि पुरस्कारको व्यवस्था रहेको आयोजकले जानकारी दिएको छ । 

असोज ३१ गते साँझ ५ बजेसम्म प्रतियोगितामा सहभागीताका लागि दर्ता गराउन सकिने छ भने कार्तिक १ गते बिहान १० बजे प्रतियोगिता उद्घाटन हुने बताइएको छ ।