फागुन २१ गतेको प्रतिनिधि सभा सदस्य निर्वाचनमा रुकुम पश्चिममा नेपाली काँग्रेसका उम्मेदवार राजु केसीले निर्वाचन खर्च विवरण बुझाउनुभएको छ । उम्मेदवार केसीले जिल्ला निर्वाचन कार्यालय रुकुम पश्चिममा निर्वाचन खर्च विवरण बुझाउनुभएको हो । उक्त विवरण अनुसार उहाँले निर्वाचनमा २२ लाख १९ हजार ३० रुपैयाँ खर्च गर्नु भएको छ । 

सबैभन्दा बढी खाना, खाजा तथा आवास, इन्धन पेट्रोल, डिजेल र प्रचारप्रसार सामग्रीमा खर्च भएको उल्लेख छ । खाना, खाजा तथा आवासमा ४ लाख ८८ हजार ७ सय ३५ रुपैयाँ खर्च भएको खर्च विवरणमा उल्लेख गरिएको छ । इन्धन पेट्रोल र डिजेलमा ४ लाख ७० हजार ८ सय ५० रुपैयाँ तथा प्रचार प्रसार सामग्री झन्डा, टोपी, ब्याचमा ४ लाख ३१ हजार खर्च भएको छ । 

त्यस्तै यातायात तर्फ २ वटा गाडी भाडामा ३ लाख ६० हजार, प्रचारप्रसार सामग्री प्रतिज्ञा पत्र र ब्यानर लगायतमा २ लाख ४६ हजार १ सय ३६ र नमुना मतपत्र छपाई तथा स्टेसनरी सामग्रीमा १ लाख १५ हजार ८ सय ६७ रुपैयाँ खर्च भएको उम्मेदवार केसीले जिल्ला निर्वाचन कार्यालयमा बुझाएको खर्च विवरणमा उल्लेख छ । 

बाँकी खर्च मध्ये आमसञ्चारका माध्यममा ३० हजार, स्टेसनरीमा ३ हजार ४ सय र मतदाता नामावली खरिदमा ३ हजार खर्च भएको बताइएको छ । रुकुम पश्चिमबाट नेपाली कम्युनिस्ट पार्टीका उम्मेदवार गोपाल शर्मा निर्वाचित भएकामा  नेपाली काँग्रेसका उम्मेदवार केसी दोस्रो हुनुभएको थियो । 

निर्वाचन आयोगले जिल्ला अनुसार निर्वाचन खर्चको सीमा तोकेको थियो । जसअनुसार रुकुम पश्चिमका उम्मेदवारहरूले अधिकतम ३१ लाखसम्म खर्च गर्न पाउने व्यवस्था थियो । निर्वाचन सम्पन्न भइसकेको अवस्थामा जिल्लामा उम्मेदवारहरूले जिल्ला निर्वाचन कार्यालय मार्फत निर्वाचन आयोगमा निर्वाचन खर्च विवरण बुझाइरहेका छन् । 

मतगणना सम्पन्न भएको मितिले ३५ दिनभित्र निर्वाचन खर्च विवरण निर्वाचन आयोगमा बुझाउनुपर्ने व्यवस्था रहेको छ । प्रतिनिधि सभा सदस्य निर्वाचन ऐन २०७४ को दफा ७२ तथा आयोगद्वारा स्वीकृत निर्वाचन आचारसंहिता बमोजिम खर्च विवरण बुझाउनुपर्ने हुन्छ ।