रुकुम पश्चिमको बाँफिकोट गाउँपालिकामा बालविवाह, किशोरावस्थाको गर्भधारण तथा विद्यालय छोड्ने दरमा कमि ल्याउने विषयमा दुई दिने कार्यशाला गोष्ठी सम्पन्न भएको छ । आईपास नेपाल र रुकुमेली समाज विकास केन्द्र रुकुम पश्चिमको साझेदारी तथा बाँफिकोट गाउँपालिकाको आयोजनामा दुई दिने कार्यशाला गोष्ठी सम्पन्न भएको हो । कार्यशाला गोष्ठीमा बालविवाह, किशोरावस्थाको गर्भधारण तथा विद्यालय छोड्ने दरमा कमि ल्याउने विषयमा योजना निर्माण, प्रभावकारी समन्वय, स्रोत साझेदारी र सामुहिक प्रभावकारिता अभिवृद्धि  लगायतका विषयमा ठाेस निर्णय गर्न गोष्ठी आयोजना गरिएको रुकुमेली समाज विकास केन्द्रका कार्यकारी निर्देशक नरेन्द्र ओलीले जानकारी दिनुभयो । 

उहाँका अनुसार बाँफिकोट गाउँपालिकामा आइपास नेपाल र रुकुमेली समाज विकास केन्द्रको साझेदारीमा यौन तथा प्रजनन स्वास्थ्यमा दिगो सवलीकरण तथा जलवायु उत्थानशीलता परियोजना सुरु हुँदै छ । जस अन्तर्गत बालविवाह, किशोरावस्थाको गर्भधारण तथा विद्यालय छोड्ने दर विषयमा देखिएका समस्यालाई कसरी संयुक्त रूपमा सम्बोधन गर्न सकिन्छ भन्ने उदेश्यले कार्यशाला गोष्ठी संचालन गरिएको हो । गोष्ठीमा बालविवाह, किशोरावस्थाको गर्भधारण तथा विद्यालय छोड्ने अवस्थाबारे तथ्याङ्क, चुनौती र समाधानका उपायहरूमा  गहन छलफल गरिएको उहाँले बताउनुभयाे । गोष्ठीबाट उक्त समस्याको न्यूनिकरणका लागि रणनीतिक योजना तथा साझा कार्ययोजना समेत तयार पारिएको छ । गाेषठी पश्चात स्थानीय सरकार, विद्यालय, स्वास्थ्य संस्था र समुदायबीचको सहकार्यमा बालविवाह र किशोरावस्थाको गर्भधारण रोकथामतर्फ ठोस कदम चालिने कार्यकारी निर्देशक ओलीले बताउनुभयो ।

दुई दिनसम्म चलेको कार्यशाला गोष्ठी कार्यक्रमको सहजीकरण आइपास नेपालबाट जीवन देवकोटा, विष्णु देवकोटा, रुकुमेली समाज विकास केन्द्रका कार्यकारी निर्देशक ओली र कार्यक्रम संयोजक केशर डाँगीले गर्नुभएको थियो । कार्यशाला गोष्ठीमा गाउँपालिका अध्यक्ष जनककुमार बांठा, उपाध्यक्ष तारा बुढा केसी, प्रमुख प्रशासकीय अधिकृत बिकासबिक्रम शाह, वडा अध्यक्ष, गाउँपालिकाका विषयगत शाखा प्रमुख, लगायतको उपस्थिती रहेको थियो ।