आगामी प्रतिनिधि सभा र प्रदेश सभा निर्वाचनमा रुकुम पश्चिममा सत्ता गठबन्धन दल नेपाली कांग्रेस र नेकपा माओवादी केन्द्रकै विचमा मुख्य प्रतिस्पर्धा हुने देखिएको छ । आइतबार जिल्लाका सबै निर्वाचन क्षेत्रमा दुवै दलले उम्मेदवारी दिएका छन् । सत्ता गठबन्धन दलहरुविचमा गत शुक्रबार रुकुम पश्चिममा प्रतिनिधि सभा र निर्वाचन क्षेत्र नम्बर १ माओवादीले पाउने सहमति भएको थियो । तर निर्वाचन क्षेत्र नम्बर २ मा माओवादी र कांग्रेस दुवैले दाबी गरेका थिए । उक्त क्षेत्रका बारेमा कुरा नमिल्दा दुवै दलले सबै क्षेत्रमा उम्मेदवारी दिएका हुन् । माओवादीले सबै क्षेत्र आफुले पाउनुपर्ने अडान राखेको छ भने कांग्रेसले कम्तिमा एउटा क्षेत्र आफ्नो भागमा पर्नुपर्ने माग गरिरहेको छ ।
गठबन्धनमा कुरा नमिलेपछि आफुहरुले मित्रवत प्रतिस्पर्धाका लागि उम्मेदवारी दिएको नेपाली कांग्रेसका जिल्ला सचिव परमेश्वर भण्डारीले बताउनुभयो । जिल्लाको विषयमा केन्द्रमा सहमति हुन नसकेपछि मित्रवत प्रतिस्पर्धाका लागि पार्टीले आधिकारीक टिकट दिएर उम्मेदवार उठाएको उहाँको भनाई छ । कांग्रेसबाट प्रतिनिधि सभामा मानबहादुर नेपालीको मनोनयन दर्ता भएको छ । प्रदेश तर्फ भने २ वटा निर्वाचन क्षेत्र मध्ये १ मा पार्टीका कर्णाली प्रदेश महामन्त्री समेत रहनुभएका कृष्णबहादुर रोकाय र २ मा जिल्ला सभापति समेत रनुभएका प्रेमप्रकाश ओलीको उम्मेदवारी परेको छ ।
माओवादी केन्द्रले भने आफ्ना उम्मेदवार गठबन्धनका उम्मेदवार भएको बताएको छ । सत्ता गठबन्धनको केन्द्रीय निर्णय अनुसार रुकुम पश्चिमका तीन वटै निर्वाचन क्षेत्रमा माओवादीले उम्मेदवारी दिएको पार्टीका जिल्ला समन्वय समिति संयोजक गोविन्द रोका सचिनले बताउनुभयो । कांग्रेसले गठबन्धन विरुद्ध उम्मेदवारी दिएको उहाँको दाबी छ । माओवादीले जिल्लाबाट प्रतिनिधि सभाका लागि बहालवावा अर्थमन्त्री जनार्दन शर्माको उम्मेदवारी दर्ता गराएको छ । प्रदेश सभा निर्वाचन क्षेत्र नम्बर १ तर्फ महेन्द्र केसी र २ तर्फ राजकुमार शर्माको उम्मेदावरी दर्ता भएको छ । यिनै उम्मेदवार गठबन्धनका रहेको रोकाले बताउनुभयो ।
सत्ता गठबन्धनमा रहेका अन्य दलले भने जिल्लामा उम्मेदवारी दिएका छैनन् । नेकपा एकीकृत समाजवादीले गठबन्धनको निर्णय अनुसार जिल्लामा उम्मेदवारी नदिएको बताएको छ । जिल्ला अध्यक्ष हरिप्रसाद शर्माले एक विज्ञप्ती जारी गर्दै सत्ता गठबन्धनका उम्मेदवारलाई पार्टीको समर्थन रहने र जिल्लाबाट कुनैपनि पदका लागि उम्मेदवारी नदिएको जानकारी गराउनुभएको छ । तर विज्ञप्तीमा सत्ता गठबन्धनका उम्मेदवार को हुन् भनेर खुलाइएको छैन् ।
सत्ता गठबन्धन दल राष्ट्रिय जनमोर्चाले पनि जिल्लामा उम्मेदवारी दिएको छैन् । उसले पनि सत्ता गठबन्धनका आधिकारीक उम्मेदवारलाई सहयोग गर्ने जनाएको छ । प्रमुख प्रतिपक्षि दल नेकपा एमालेले जिल्लाका सबै क्षेत्रमा उम्मेदवारी दिएको छ । प्रतिनिधि सभामा जिल्ला अध्यक्ष नन्दराम देवकोटाले उम्मेदवारी दिँदा प्रदेश १ मा नारायणकुमार शाह र २ मा कर्णबहादुर घर्तीले उम्मेदवारी दिनुभएको छ ।
जिल्लामा गत २०७४ सालको प्रतिनिधि सभा र प्रदेश सभाको निर्वाचन सबै क्षेत्रमा माओवादीले जितेको थियो । जिल्लामा माओवादीको मुख्य प्रतिस्पर्धी दल कांग्रेस हो । एमालेको हैशियत जिल्लामा तेस्रो हो । गत वैशाख ३० मा भएको स्थानीय तहको निर्वाचनमा कांग्रेसले सत्ता गठबन्धन भन्दा बाहिर गएर एमालेसंग तालमेल गरेको थियो । जिल्लामा अहिले कांग्रेस माओवादीका विचमा तालमेल हुन नदिने मुख्य कारण त्यही हो ।
एमालेसंग तालमेल गरेर कांग्रेसले माओवादीबाट २ वटा स्थानीय तह छिनेको थियो । झिनो मतान्तरले मुसीकोट नगरपालिकाको प्रमुख र बाँफिकोट गाउँपालिकाको अध्यक्ष गुमाएको माओवादी अहिले कांग्रेसलाई कुनै क्षेत्र दिने मनस्थितिमा पुगेको बताइन्छ ।
