रोग नियन्त्रण भएको भनिएको १३ वर्षपछि रुकुमपूर्वमा कुष्ठरोगी देखिन थालेका छन् । नेपाल सरकारले वि.सं. २०६६ सालमै कुष्ठरोग निवारण गरेपछि दशक सम्म यो रोगको परीक्षण भएको थिएन । चालु आर्थिक वर्षमा हाल तीन जना बिरामी रहेको स्वास्थ्य कार्यालयका सूचना अधिकारी निमप्रसाद गिरीले बताउनुभयो । 

सिस्ने गाउँपालिकामा दुई, पुथाउत्तरगंगा गाउँपालिकामा एक गरी जिल्लामा तीन कुष्ठरोगीले औषधि सेवन गरिराखेको गिरीले जानकारी दिनुभयो । यो संख्या आफै स्वास्थ्य संस्थाको सम्पर्कमा आएको उहाँले बताउनुभयोे । खोजी अभियान अझै जारी रहेको गिरीले बताउनुभयो । कुष्ठरोग लागेकाहरूले नियमित औषधि सेवन गरेमा अन्यमा नसर्ने गिरीले  जानकारी दिनुभयो । 

कुष्ठरोगप्रति सामाजिक भेदभाव बढी भएकाले त्यसबारे सचेतना ल्याउनुपर्ने स्वास्थ्य कार्यालयका प्रमुख नाराणयप्रसाद चौधरीले बताउनुभयो । ‘यो ब्याक्टेरियाबाट सर्ने रोग भएकाले धार्मिक अन्धविश्वासबारे भ्रम चिर्नुपर्छ’ उहाँले भन्नुभयो ‘औषधि खान थालेपछि सर्ने दर ९९ प्रतिशत घट्छ ।’ बिरामीले आफ्नो समस्या निको हुनका लागि मात्रै ६ महिनादेखि १ वर्षसम्म औषधि सेवन गर्नुपर्छ ।

शरीरमा लाटो फुस्रो दाग देखिएमा कुष्ठरोगको सम्भावना रहन्छ । त्यस्ता मानिसले समयमै जचाउनुपर्ने स्वास्थ्यकर्मीले बताएका छन्् । कुष्ठरोग लागेपछि शरीरका अंगले घाउ भएको समेत थाहा नपाउने भएकाले अन्य संक्रमणको जोखिम पनि उत्तिकै रहेको छ । कुष्ठरोगलाई जनस्वास्थ्यको साझा समस्याको रुपमा लिएर फेरि उपचार र खोजी अभियान थाल्नुपर्ने स्वास्थ्यकर्मीको भनाइ रहेको छ । 

स्वास्थ्य कार्यालय, रुकुमपूर्वको आयोजनामा ७० औं विश्व कुष्ठरोग दिवसको अवसरमा आइतबार रुकुमकोटमा आयोजित पत्रकारसँगको अन्तरक्रिया राखिएको थियो । सरकारले कुष्ठरोगीका लागि निःशुल्क औषधि र यातायात खर्च उपलब्ध गराएको छ । समयमा उपचार नगरे अपाङ्गता हुने खतरा हुने गरेको समेत स्वास्थ्यकर्मीको भनाइ रहेको छ ।