कर्णाली प्रदेशका मुख्यमन्त्री राजकुमार शर्माले कर्णालीको मुख्य दुस्मन गरिबी रहेको बताउनुभएको छ । नेपाल पत्रकार महासंघ रुकुम पश्चिमले सदरमुकाम मुसिकोट खलंगामा आयोजना गरेको पत्रकार सम्मेलनलाई सम्बोधन गर्दै उहाँले कर्णालीको मुख्य दुस्मन गरिबी रहेको र गरिबी निवारण सरकारको पहिलो प्राथमिकता रहेको बताउनुभएको छ ।
कसरी वेरोजगार मुक्त प्रदेश बनाउने भनेर आफ्नो कार्यकाल भरिमा योजना बनाएर अघि बढ्ने उहाँको भनाई छ । यसको सुरुवात गरिसकेको उहाँले बताउनुभयो । आफुले पदभार ग्रहण गर्दा एक वर्षमा १० हजार वेरोजगारलाई रोजगारी दिने निर्णयमा हस्तारक्षर गरेको उहाँले बताउनुभयो । रोजगारीसंग जोडेर पूर्वाधार निर्माणलाई प्राथमिकतामा राखिने उहाँले स्पस्ट पार्नुभयो ।
‘हामीले गरिबी अन्त्य गर्ने भनेका छौं, यसका लागि पूर्वाधार निर्माणलाई प्राथमिकतामा राखेका छौं, उहाँले भन्नुभयो–शिक्षा, स्वास्थ्य र रोजगार, त्यसका लागि भौतिक पूर्वाधार भनेका छौं ।’ विकटलाई निकट बनाउन प्रदेश सरकारले सडक पूर्वाधारलाई प्राथमिकता दिएको पनि उहाँले बताउनुभयो । बर्दियाको भुरिगाउँ देखि चीनको सीमाना ताक्लाकोटसम्म जोड्ने सडक निर्माणलाई प्राथमिकता दिएको जानकारी गराउनुभयो ।
लुम्बिनी प्रदेश देखि चीनको सीमानासम्म सडक जोडर कर्णाली प्रदेशलाई सुगम बनाउन व्यवस्थित सडक बनाउने, कर्णाली करिडोर र भेरी करिडोरलाई डोल्पाको धो सम्म पुर्याउने, मध्यपहाडी लोकमार्गलाई टनेलबाट जुम्ला पुर्याउने, राप्ती राजमार्गरलाई रुकुम पश्चिमको छरेवगरसम्म व्यवस्थित गर्ने र लुम्बिनी देखि रारा जोड्ने योजनालाई प्राथमिकता दिइएको मुख्यमन्त्री शर्माले बताउनुभयो ।
कर्णालीमा राजनीतिक संघीयता आएपनि वित्तीय र प्रशासनीक संघीयता अझै आइनसकेको समेत उहाँले बताउनुभयो । मानव सुचकांकमा पछाडि परेको कर्णालीलाई माथि उठाउन संघीयता व्यवहारमै लागु हुनुपर्ने भनाई उहाँको छ । साधान स्रोतका आधारमा कर्णाली निकै सम्पन्न भएपनि त्यसको परिचालन सही रुपमा हुन नसक्दा कर्णालीले लाभ लिन नसकिरहेको उहाँको बुझाई छ ।
जल, जमिन, खानी, पर्यटन, धार्मिक सम्पदाहरुको उच्चतम प्रयोग गर्न सकिने तर्फ पनि आफ्नो ध्यान केन्द्रीत गर्ने उहाँको भनाई छ । प्रविधिमैत्री शिक्षा, कृषिमा व्यवसायीकरण, वडास्तर सम्मै सहज र गुणस्तरीय स्वास्थ्य सेवा, थप मेडिकल कलेज स्थापना जुरुरी रहेको उहाँले बताउनुभयो । कर्णालीको समग्र विकासका लागि खाका कोर्ने काम भइरहेको र यसका लागि एउटा कार्यदल नै बनाएर काम भइरहेको समेत उहाँले जानकारी गराउनुभयो ।
साथै उहाँले प्रदेशलाई काम गर्न नदिने र प्रदेश अफसल भए अव संघीयता भारी भयो भनेर हल्ला नफैलाउन सबैलाई आग्रह गर्नुभयो । प्रदेश सरकारलाई पूर्ण रुपमा अधिकार सम्पन्न बनाएर काम गर्न दिनुपर्ने उहाँको भनाई छ । प्रदेशलाई संघको इकाईका रुपमा हेर्दासम्म प्रदेशले देखिने गरी विकासको अनुभुति दिलाउन नसक्ने उहाँले बताउनुभयो ।
