रुकुम पश्चिमको मुसिकोट नगरपालिकाले आवधिक योजना निर्माण गर्दै छ । जसका लागि नगरपालिकाले २ दिने गोष्ठी आयोजना गरेको छ । आजबाट सुरु भएको आवधिक योजना निर्माण सम्वन्धि पूर्व तयारी कार्यशाला गोष्ठी भोलीसम्म संचालन हुने छ । हेड लाइट प्रा.लि. काठमाडौंको सहजिकरणमा नगरपालिकाले गोष्ठी आयोजना गरेको हो ।
५ वर्षे आवधिक योजना निर्माण हुन लागेको नगरपालिकाका निमित्त प्रमुख प्रशासकीय अधिकृत बिनाराम खड्काले जानकारी दिनुभयो । गोष्ठीको आज पहिलो दिन सहजकर्ता रमेश अधिकारीले विकास र योजनाको संक्षिप्त प्रस्तुतिका साथै मुसिकोट नगरपालिकाको आवधिक योजना निर्माणको प्रक्रियाका बारेमा जानकारी गराउनुभएको छ ।
भोली सामाजिक विकास क्षेत्रको अवधारणा, मुसिकोट नगरपालिकाको परिकल्पना, लक्ष, उदे्श्यहरु, रणनीति र कार्यनीतिको निर्माण, पालिकाका सवल पक्षहरु, सुधार गर्नुपर्ने पक्षहरु, अवसरहरु र चुनौतीहरुको विश्लेषण, विषयगत समितिको नेतृत्वमा लक्ष, उदे्श्यहरु, रणनीति र कार्यनीतिहरुको निर्माण र विषयगत समितिहरुको सोच, लक्ष र कार्यक्रमहरुको निर्माणका बारेमा सहजिकरण हुने खड्काले बताउनुभयो ।
करिब ३ महिनामा आवधिक योजना निर्माण हुने सहजकर्ता कर्णवहादुर नेपालीले बताउनुभयो । यो पूर्व छलफल रहेको र छलफल पछि वडास्तरमै पुगेर योजना निर्माण हुने उहाँको भनाई छ । त्यसरी निर्माण भएको आवधिक योजनाका बारेमा फेरि यसैगरी छलफल हुने र त्यसपछि नगरलाई हस्तान्तरण गर्ने उहाँले बताउनुभयो ।
२ दिने गोष्ठीको कर्णाली प्रदेश सभा सदस्य मिलन खड्काले उद्घाटन गर्नुभएको हो । नगर प्रमुख महेन्द्र केसीको अध्यक्षतामा भएको कार्यक्रममा पूर्व नगर प्रमुख देविलाल गौतम, उप प्रमुख प्रेमकुमारी सुनार, आठबीसकोट नगरपालिकाका पूर्व प्रमुख गोर्खबहादुर केसी, राजनीतिक दल, विभिन्न संघ संस्थाका प्रमुख तथा प्रतिनिधि, पत्रकार लगायतको उपस्थिति रहेको थियो ।
नगर उप प्रमुख विमलकुमार पुनको स्वागत मन्तव्य रहेको उद्घाटन कार्यक्रमको संचालन निमित्त प्रमुख प्रशासकीय अधिकृत खड्काले गर्नुभएको थियो ।
