वर्षाैँ देखि बाँझो रहेको रुकुमपूर्वका खाली जग्गामा केही दिन देखि चहलपहल रह्यो । स्थानीय बासिन्दा खाडल खन्ने, मलको व्यवस्थापन गर्ने र बिरुवा लगाउने काममा व्यस्त भए । व्यक्तिगत र सामूहिक रूपमा कलमी टर्कीका दाँते ओखर लगाउने व्यापक तयारीमा जुटे । डिभिजन वन कार्यालय रुकुमपूर्वले किसानको आम्दानी बढाउन ओखरका बिरुवा खरिद गरेर किसानलाई बाँडेको थियो । “सित्तैमा बिरुवा पाएपछि बाँझो जग्गामा धमाधम लगाइयो” भूमे गाउँपालिका–३ झुम्लाबाङका रामबहादुर बुढा मगरले भन्नुभयो–“बिरुवा हुर्केपछि आम्दानी पनि राम्रै होला ।”
डिभिजन वन कार्यालयले टर्कीबाट फर्नर जातका बिरुवा ल्याएको हो । तीन–चार वर्षमै फल्ने ओखरका बिरुवा दुई वर्ष टर्कीमै हुर्केका थिए । जिल्लामा मङ्गलबार एकै दिनमा सोह्र हजार टर्कीबाट ल्याइएको दाँते ओखरका बिरुवा रोपिएको छ । लुम्बिनी प्रदेशका वन तथा वातावरण मन्त्री दुर्गाप्रसाद चौधरी, सङ्घीय एवम् प्रदेश सांसद्हरू र जिल्ला स्थित स्थानीय सरकारका प्रमुख तथा प्रतिनिधिको उपस्थितिमा उक्त बिरुवा रोपिएको डिभिजनल वन अधिकृत जितेन्द्रसिंह खड्काले बताउनुभयो । डिभिजन वन कार्यालय रुकुमपूर्वको आयोजनामा मङ्गलबार एकै दिन जिल्लाको विभिन्न ठाउँमा गरी सोह्र हजार टर्कीका दाँते ओखर रोपिएको खड्काले जानकारी दिनुभयो ।
ओखरको बिरुवा लगाउने कार्यको सुरुवात गर्दै वन तथा वातावरण मन्त्री चौधरीले लुम्बिनी प्रदेश सरकारले ओखर खेतीबाट राम्रो सम्भावना देखेको बताउनुभयो । त्यहि सम्भावनालाई मध्यनजर गर्दै अघिल्लो सरकारले ओखर खेतीमा लगानी गर्दै आएको बताउदै उहाँले त्यसै कार्यलाई अहिले निरन्तरता दिएको बताउनुभयो । मन्त्री चौधरीले किसानकै मागको आधारमा सरकारले लगानी गरेको बताउदै अब सरकारको लगानीलाई खेर जान नदिन किसानले मेहनत गर्नुपर्ने बताउनुभयो ।
यसैगरी प्रतिनिधिसभाका सांसद् पूर्णबहादुर घर्ती मगरले कृषकको आयआर्जन गराउने उद्देश्यले सरकारले निःशुल्क रूपमा बाँडेको ओखरका बिरुवा कृषकले राम्रोसँग रेखदेख गरी आम्दानीको मुख्य स्रोत बनाउनु पर्ने बताउनुभयो । “जिल्लाको माथिल्लो क्षेत्रमा बाँझो रहेका जग्गा अब खाली रहने छैनन्” उहाँले भन्नुभयो–“यसले यहाँका जनताको आयस्तर पनि बढाउने छ ।” जिल्लाभरबाट छनोट भएका एक सय ३८ जना किसानलाई वितरण गरिएका सोह्र हजार बिरुवा मङ्गलबार एकैसाथ लगाइएको डिभिजन वन कार्यालयले जनाएको छ । प्रत्येक किसानले न्यूनतम १० बोट देखि ६६ सम्म ओखरको बिरुवा लगाएका छन् ।
सिस्ने गाउँपालिका–५ रुमालबारामा मन्त्री चौधरी सहित लुम्बिनी प्रदेशसभाका सांसद्हरु सुरुल पुन मगर, दिलकुमारी बुढा मगर, सरिता पुन मगर, सिस्ने गाउँपालिका अध्यक्ष कृष्ण रेग्मी, पुथाउत्तरगंगा गाउँपालिका अध्यक्ष पुनिराज घर्ती मगर, सिस्ने गाउँपालिका उपाध्यक्ष गोपाल रेउले, पुथाउत्तरगंगा गाउँपालिका उपाध्यक्ष भूपेन्द्रा बुढा लगायतले बिरुवा रोपेर कार्यक्रमको सुरुवात गर्नुभएको थियो ।
भने भूमे गाउँपालिका–३ झुम्लाबाङमा प्रतिनिधि सभाका सांसद् सदस्य पूर्णबहादुर घर्ती मगर, जिल्ला समन्वय समितिका उपप्रमुख मोहनबहादुर केसी, गाउँपालिका अध्यक्ष होमप्रकाश श्रेष्ठ, उपाध्यक्ष सविना बुढा लगायतले बिरुवा रोपेर सुरुवात गर्नुभएको हो । यसैगरी पुथाउत्तरगंगा गाउँपालिकामा डिभिजन वन कार्यालयको कर्मचारीसँगै वडाका जनप्रतिनिधिको उपस्थितिमा दाँते ओखरको बिरुवा रोप्ने कार्य सुरु गरिएको थियो ।
