रुकुम पश्चिमको आठबीसकोट नगरपालिकाले एक नीजि वर्कशपलाई पैसा दिन लागेको भन्दै सामाजिक सञ्जालमा चर्को आलोचना भएपछि नगरपालिकाले नगरको एक वर्कशपसंग गरेको सम्झौता रद्ध गरेको छ । 

नगरपालिकाका सवारी साधान मर्मत सम्भारका लागि लागत साझेदारीमा आर.एम.इन्जिनियरिङ अटो मोवाइल वर्कशप एण्ड सल्लायर्स आठबीसकोट नगरपालिका ११ संग भएको सम्झौता कार्यान्वयन नगर्ने नगरपालिकाले आज एक विज्ञप्ती जारी गरेर जानकारी गराएको छ । 

नगर कार्यपालिकाको निर्णय र नगरपालिकाको सार्वजनिक साझेदारी ऐन २०७५ अनुसार नगरका सवारी साधन मर्मतसम्भारका लागि मेशिन खरिद र भौतिक पूर्वाधार निर्माण गर्न लागत साझेदारीमा उक्त वर्कशपसंग सम्झौता गरेको नगरपालिकाले स्पस्ट पारेको छ । 

नियमसंगत नै सम्झौता भएपनि यस विषयलाई लिएर विभिन्न नकारात्मक टिप्पनीहरु हुन थालेपछि यसलाई ध्यानमा राख्दै उक्त वर्कशपसंगको साझेदारीको निर्णय कार्यान्वयन नगरिने नगर प्रमुख रवि केसीले जारी गरेको विज्ञप्तीमा उल्लेख छ । 

नगर प्रमुखले आफ्ना कार्यकर्तालाई पोस्ने गरी बजेट छुट्याएको भन्दै सामाजिक सञ्जालमा चर्को आलोचना भएको थियो । त्यसकै कारण नगरपालिकाले आज विज्ञप्ती जारी गरेर सम्झौता रद्ध गरेको जानकारी गराएको हो ।