रुकुम पश्चिमको मुसिकोट नगरपालिकाले म्याराथन धावक दुर्गाराज बुढालाई नगद सहित सम्मान गरेको छ । आज नगर कार्यपालिकाको कार्यालयमा बोलाएर नगरपालिकाले बुढालाई नगद १५ हजार सहित सम्मान गरेको हो । 

बुढाले  केही दिन अघि मुसिकोट नगरपालिकामा आयोजित मुसिकोट हेरिटेज रन (मिनी म्याराथन)को उपाधि जित्नुभएको थियो । बुढा मुसिकोट नगरपालिका वडा नम्बर ५ निवासी हुनहुन्छ । बुढाले जिल्लामै तथा देश तथा विदेशमा आयोजना भएका अल्ट्रा म्याराथनमा भाग लिएर कयौँ प्रतियोगिता जितिसक्नुभएको छ । 

राष्ट्रिय तथा अन्तर्राष्ट्रिय प्रतियोगिता जितेर जिल्लाको नाम उँचो बनाएको भन्दै उहाँको योगदानको कदर स्वरूप सम्मान गरिएको मुसिकोट नगरपालिकाका प्रमुख महेन्द्र केसीले जानकारी दिनुभयो । यो सम्मानले थोरै भए पनि योगदान गर्ने उहाँले विश्वास व्यक्त गर्नुभयो । 

नगर प्रमुख केसी सहित उपप्रमुख विमलकुमार पुन, प्रमुख प्रशासकीय अधिकृत मोहनप्रकाश गिरीले धावक बुढालाई नगद तथा सम्मान पत्रले सम्मान गर्नुभएको हो ।