१८ औँ पुस्तकालय दिवसका अवसरमा जिल्ला कारागार रुकुम पश्चिमका कैदी बन्दीहरूलाई पुस्तक प्रदान गरिएको छ । जनविकास पुस्तकालय र पुस्तक तथा स्टेशनरी व्यवसाय महासङ्घ रुकुम पश्चिमले संयुक्त रूपमा आज बिहान जिल्ला कारागार पुगेर कैदी बन्दीहरूका लागि विभिन्न प्रकारका पुस्तक उपलब्ध गराएका हुन् । 

दिवसको अवसरमा कारागारमा रहेका कैदी बन्दीहरूलाई पुस्तक उपलब्ध गराउने भदौ ११ गते बसेको जनविकास पुस्तकालय र पुस्तक तथा स्टेशनरी व्यवसाय महासङ्घको संयुक्त बैठकको निर्णय अनुसार आज कारागारमै पुगेर विभिन्न प्रकारका पुस्तकहरू उपलब्ध गराइएको हो । 

करिब ५० हजार बराबरका पुस्तक प्रदान गरिएको जनविकास पुस्तकालयले जनाएको छ । पुस्तक तथा स्टेशनरी व्यवसायी महासङ्घले पुस्तक उपलब्ध गराएको हो । चर्चित उपन्यास, निबन्ध, कविता, गजल सङ्ग्रह सहितका पुस्तक तथा कापी समेत उपलब्ध गराइएको जनविकास पुस्तकालयका सह सचिव ओमबहादुर केसीले जानकारी दिनुभयो । 

त्यस्तै जिल्लास्थित लेखकहरूका पुस्तकहरू समेत उपलब्ध गराइएको उहाँले बताउनुभयो । जिल्लास्थित लेखक तथा अन्य व्यक्तिहरूलाई आफूले लेखेका वा आफूले पढेर थन्किएका पुस्तक उपलब्ध गराउन सार्वजनिक अपिल गरिएको थियो । सो अनुसार विभिन्न व्यक्तिहरूले समेत पुस्तक उपलब्ध गराएको बताइएको छ । 

पुस्तक सहित एउटा भलिबल र चेस बोर्ड लगायतका खेल सामग्री समेत प्रदान गरिएको जनविकास पुस्तकालयले जनाएको छ । कैदी बन्दीहरूलाई सृजनशील बनाउन कैदी बन्दी समेतको मागमा पुस्तक उपलब्ध गराइएको हो । कर्णाली प्रदेशका पूर्व सचिव भरतकुमार शर्माको पहलमा यो कार्यक्रम तय गरिएको थियो । 

एक कार्यक्रमका बिच पुस्तक तथा खेल सामग्री प्रदान गरिएको हो । प्रमुख जिल्ला अधिकारी दिनेशप्रसाद थानी, कर्णाली प्रदेशका पूर्व सचिव भरतकुमार शर्मा, जनविकास पुस्तकालयका कार्यवाहक अध्यक्ष नारायणप्रसाद शर्मा, पुस्तक तथा स्टेशनरी व्यवसाय महासङ्घका जिल्ला अध्यक्ष कर्ण ओली लगायतले कारागार प्रशासनलाई पुस्तक र खेल सामग्री हस्तान्तरण गर्नुभएको हो । 

जनविकास पुस्तकालयका कार्यवाहक अध्यक्ष नारायणप्रसाद शर्माको अध्यक्षतामा भएको कार्यक्रममा प्रमुख जिल्ला अधिकारी दिनेशप्रसाद थानीको प्रमुख र कर्णाली प्रदेशका पूर्व सचिव भरतकुमार शर्माको विशेष आतिथ्यता रहेको थियो । 

त्यस्तै कार्यक्रममा जिल्ला प्रहरी प्रमुख प्रहरी नायब उपरीक्षक प्रमेश विष्ट, प्रमुख अनुसन्धान अधिकृत नेबबहादुर राना, जिल्ला कारागारका निमित्त जेलर अकबिर घर्ती, सशस्त्र प्रहरी बलका सशस्त्र प्रहरी नायब निरीक्षक मधु गौतम लगायतको आतिथ्यता रहेको थियो । 

पुस्तक तथा स्टेशनरी व्यवसायी महासङ्घका जिल्ला अध्यक्ष कर्ण ओलीको स्वागत मन्तव्य रहेको कार्यक्रमको सञ्चालन जन विकास पुस्तकालयका सह सचिव ओमबहादुर केसीले गर्नुभएको थियो ।