नेकपा माओवादी केन्द्र जिल्ला समन्वय समिति रुकुम पश्चिमले पार्टीका जिल्ला समन्वय समिति सदस्य कर्णबहादुर नकाल शिशिरको निधनमा शोक व्यक्त गरेको छ । एक शोक विज्ञप्ति जारी गर्दै पार्टीले जिल्ला सदस्य, वाइसीयल नेपालका पूर्व जिल्ला अध्यक्ष, जनमुक्ति सेना नेपालका पूर्व बिग्रेड सहायक कमान्डर शिशिरको निधनमा शोक व्यक्त गरेको हो । 

जिल्लाको सानीभेरी गाउँपालिका वडा नं. ३, गरायला निवासी उहाँको ४५ वर्षको उमेर भाद्र १५ गते निधन भएको हो । शिशिरको अकल्पनीय र असामयिक निधनले पार्टीलाई स्तब्ध तुल्याएको पार्टीका जिल्ला इन्चार्ज वसन्तकुमार शर्मा कुशल र गोविन्द रोका सचिनले जारी गरेको शोक विज्ञप्तिमा उल्लेख छ ।

पार्टीका एक होनहार, साहसी र कर्तव्यनिष्ठ योद्धा क. शिशिरको निधनबाट हाम्रो पार्टी र कम्युनिस्ट आन्दोलनमा अपूरणीय क्षति हुन गएको छ, विज्ञप्तिमा भनिएको छ । उहाँले छोडेर गएका क्रान्तिका बाँकी कार्यभार पुरा गर्ने र उहाँका अधुरा सपनाहरू साकार पार्न हरपल प्रयत्न गरिरहने विज्ञप्ति मार्फत प्रतिबद्धता व्यक्त समेत गरिएको छ । 

दिवङ्गत शिशिरप्रति भावपूर्ण श्रद्धाञ्जली र शोक सन्तप्त परिवार तथा आफन्तजनमा गहिरो समवेदना समेत प्रकट गरिएको छ ।