नेपाली कम्युनिस्ट पार्टी (साबिक माओवादी केन्द्र) रुकुम पश्चिम मुसिकोट नगर समितिले एकताको पक्षमा एक ढिक्का रहेको स्पष्ट पारेको छ । आइतबार भएको पदाधिकारी हेरफेर पछिको नगर समितिले नेकपा एकीकृत समाजवादी लगायतका दलसँग भएको एकताको पक्षमा एक ढिक्का रहेको बताएको हो । 

२०८१ पुस १३ गतेको तेस्रो अधिवेशनबाट ५५ जनाको निर्वाचित नगर समिति रहेकोमा ४० जना पदाधिकारी तथा सदस्यहरू एक ढिक्कासहित एकताको पक्षमा रहेको नगर अध्यक्ष धनबहादुर खड्का र सचिव अनिल बुढाले जारी गरेको विज्ञप्तिमा उल्लेख छ । 

मुसिकोटवासी आम कार्यकर्ता, सहिद तथा बेपत्ता परिवार, घाइते तथा उहाँका परिवारजन, शुभचिन्तक, मतदाता र जनसमुदाय विचलित नभई एकताबद्ध रहेको, निरन्तर विकास र समृद्धिको यात्रामा विगतको विरासतलाई पछ्याउँदै गणतन्त्र र संविधानको रक्षाका लागि कटिबद्ध रहेको स्पष्ट पारिएको छ । 

तत्कालीन अध्यक्ष दलबहादुर खड्का सहित बहुमत पदाधिकारी एकताको पक्षमा असन्तुष्ट हुँदै जनार्दन शर्मा प्रभाकरले घोषणा गरेको प्रगतिशील राष्ट्रिय अभियानमा खुलेपछि आइतबार भएको प्रथम भेलाले अध्यक्ष सहितका पदाधिकारीमा हेरफेर गरेको थियो ।

त्यसपछि नगर समितिले आज विज्ञप्ति जारी गर्दै अधिकांश एकताको पक्षमा रहेको र बाँकी रहेकाहरूसँग पनि छलफल गरिरहेकोले उहाँहरू पनि एकताको पक्षमा उभिने विश्वास लिइएको विज्ञप्तिमा उल्लेख छ । साथै नेपाली कम्युनिस्ट पार्टीको केन्द्रीय समितिबाट प्राप्त हुने नीति, निर्देशन तथा कार्यक्रम कार्यान्वयनका लागि एकाकार भएर अगाडी बढ्ने प्रतिबद्धता समेत व्यक्त गरिएको छ । 

साथै मुसिकोटवासीको भावना र सोचलाई सम्मान गर्दै निराशा हुन नदिने गरी नेपाली कम्युनिस्ट पार्टीको झन्डामुनि गोलबद्ध भई सक्रियतापूर्वक कार्य गर्ने समेत बताइएको छ ।