साबिक नेकपा माओवादी केन्द्र मुसिकोट नगरपालिका वडा नं. ६ को सिङ्गो वडा समितिले पार्टी एकताको समर्थन गर्दै नेपाली कम्युनिस्ट पार्टीमा आबद्ध हुने निर्णय गरेको छ । 

शुक्रवार सम्पन्न वडा समितिको प्रथम विस्तारित बैठकले टुटफुट र विभाजनलाई अस्वीकार गर्दै प्रचण्डको नेतृत्वमा १५ वटा कम्युनिस्ट पार्टीहरू मिलेर बनेको नेपाली कम्युनिस्ट पार्टीमा आबद्ध हुने निर्णय गरेको हो । 

बैठकलाई सम्बोधन गर्दै नेपाली कम्युनिस्ट पार्टीका केन्द्रीय सदस्य एवं जिल्ला संयोजक गोविन्द रोका सचिनले कतिपय नेताहरूले वैचारिक रूपमा विचलित हुँदै क्रान्तिकारी जनतालाई धोका दिएर पार्टी छोडे पनि रुकुमेली जनता रत्तिभर विचलित नभएको बताउनुभयो । 

एकाध नेताहरूले पार्टी छोड्दैमा रुकुमेली जनता र कार्यकर्ताहरू उनीहरूको पछि नलागेको गर्विलो इतिहास स्मरण गर्दै संयोजक रोकाले जिल्लामा पार्टीको जितको विरासत जोगाउने अठोट व्यक्त गर्नुभयो ।

अर्का केन्द्रीय सदस्य बुद्धिप्रसाद शर्माले जनार्दनलाई रुकुमेली जनताले लगातार २० वर्ष सत्तामा पुर्‍याएको र पार्टीले पनि पटक पटक शक्तिशाली मन्त्रालयको जिम्मेवारी दिएको भन्दै आफूलाई पुगिसकेपछि अरूलाई धोका दिएको टिप्पणी गर्नुभयो । पदमा रहँदा राम्रै काम गरेको भए पनि जनार्दनले अहिले पार्टी छोडेर शहीद, घाइते अपाङ्ग र जनताका सपनामा घात गरेकोले आफूहरू उनको पछि नलागेको शर्माको भनाइ थियो । 

बैठकमा पार्टीका प्रदेश समिति सदस्य तथा सरकारका वडा अध्यक्ष भानु मल्लले वडावासी कार्यकर्ता र समर्थक जनताहरू पार्टी एकताको पक्षमा दृढतापूर्वक उभिएको भन्दै आफूहरू अझ सक्रियताका साथ जनताको सेवामा खट्ने प्रतिबद्धता व्यक्त गर्नुभयो । पार्टीका मुसिकोट नगर समिति अध्यक्ष धनबहादुर खड्का वसन्तले गल्ती गर्ने नेताहरूको पछाडि मुसिकोटवासी जनता कहिल्यै नलागेको र अब झन् गैर कम्युनिस्ट पार्टीमा जाने अवस्था नै नरहेको विश्लेषण गर्नुभयो ।

वडा समितिको विस्तारित बैठकले पदाधिकारी हेरफेर गर्दै दीपक बोहरालाई अध्यक्ष र मदन मल्ललाई सचिवको जिम्मेवारी दिएको छ । दीपक बोहराको अध्यक्षता र अनिल बुढाको सञ्चालनमा सम्पन्न बैठकले वडाका संस्थापक कम्युनिस्ट नेताहरू तथा पूर्व जनमुक्ति सेनाहरूलाई सम्मान गरेको छ ।