नेकपा एमाले रुकुम पश्चिमले चुनाव मार्फत ११ औँ महाधिवेशन प्रतिनिधि चयन गरेको छ । सर्वसम्मत हुन नसकेपछि हिजो साँझ अबेरसम्म मतदान चलेको थियो । उक्त मतदानबाट ६ जना प्रतिनिधि चयन भएका छन् । खुला २ जना, महिला २ जना, युवा १ जना र दलित एक जना गरी ६ जना प्रतिनिधि चयन भएको निर्वाचन कमिटीले जानकारी दिएको छ ।

निर्वाचन कमिटिका अनुसार खुला तर्फ नन्दराम देवकोटा र दिनेश चन्द, महिला तर्फ कौशिला केसी र हिमकुमारी केसी, युवा तर्फ प्रकाश खड्का र दलित तर्फ शशीराम नेपाली चयन हुनुभयो । खुला तर्फ पार्टीका जिल्ला अध्यक्ष नन्दराम देवकोटा सहित दिनेश चन्द र टंकप्रसाद ओली प्रतिस्पर्धामा रहेकामा देवकोटाले २८१, चन्दले २५४ पाएर प्रतिनिधि चयन भएकामा ओलीले १२२ मत पाउनुभयो ।

महिला तर्फ कौशिला केसी, हिमकुमारी केसी, तुलसा मल्ल र डण्डी कार्की प्रतिस्पर्धामा रहेकामा कौशिलाले २०४, हिमकुमारीले २०३ सहित महाधिवेशन प्रतिनिधि चयन भएकोमा डन्डीले ११६ र तुलसाले १११ मत पाएको निर्वाचन कमिटीले जानकारी गराएको छ । युवा तर्फ प्रकाश खड्का र लालबहादुर बुढा प्रतिस्पर्धामा रहेकामा खड्काले १७७ र बुढाले १४६ मत पाउनुभयो ।

दलित तर्फ भने सर्वसम्मत भएको बताइएको छ । यही कार्तिक २७ देखि २९ गतेसम्म काठमाडौँमा हुने ११ औँ राष्ट्रिय महाधिवेशनका लागि प्रतिनिधि चयन गरिएको हो ।