नेपाल भलिबल सङ्घको आयोजनामा हुन लागेको नवौँ एन.भि.ए. महिला तथा पुरुष भलिबल च्याम्पियनसिप अन्तर्गत रुकुम पश्चिमले पुरुष भलिबलमा भाग लिने भएको छ । रुकुम पश्चिम भलिबल प्रशिक्षण केन्द्रले कर्णाली प्रदेश भलिबल सङ्घ सँगको समन्वयमा पुरुष तर्फ टिम सहभागी बनाउन लागेको हो । च्याम्पियनसिप यही पुस ११ गते देखि २० गतेसम्म काठमाडौँको त्रिपुरेश्वर स्थित राष्ट्रिय खेलकुद परिषद्को कवर्ड हलमा हुँदै छ ।

जसमा सहभागी हुने जानकारी सहित रुकुम पश्चिम भलिबल प्रशिक्षण केन्द्रले टोलीको घोषणा गरेको छ । प्रशिक्षण केन्द्रका अध्यक्ष तथा टिम प्रशिक्षक तेज बुढाका अनुसार टिममा पाकिस्तानका माजर अलि खान सहित ३ जना खेलाडी रहने छन् । नेपाली भलिबल समर्थकका बिचमा माजर अलि परिचित नाम हो भने उनी नेपालमा सफल समेत छ ।

उनले टिप टप हेल्प नेपालबाट खेलिसकेका छन् भने टिमलाई च्याम्पियन पनि बनाएका छन् । उनीसँगै टिममा पाकिस्तानकै वालिद खान र अहमद खान समेत रहने बुढाले जानकारी गराउनुभयो । टिम क्याप्टेनमा शैलेन्द्र शाही रहँदा अन्य खेलाडीमा जीवन शाही, डायमन्ड खड्का, रोशन खड्का, विकास गिरी, पुष्करसिंह धामी, गोपाल खनाल, मानसिंह विक र पवन थापा मगर रहेका छन् ।

प्रशिक्षकमा तेज बुढा, सहायक प्रशिक्षकमा दुर्गा रेग्मी र टिम व्यवस्थापकमा यमन बाँठा मगर रहनुभएको छ । रुकुमले यो स्तरको प्रतियोगितामा पहिलो पटक भाग लिन लागेको प्रशिक्षण केन्द्रका अध्यक्ष तथा प्रशिक्षक बुढाले बताउनुभयो । सहयोग जुटाएर टिम लिएर जान लागेको उहाँले बताउनुभयो । यसले जिल्लाको भलिबल विकासमा टेवा पुर्याउनुका साथै जिल्लाको पहिचानलाई उँचो बनाउने उहाँको विश्वास छ ।