प्रगतिशील लोकतान्त्रिक पार्टी प्रलोपा रुकुम पश्चिमले जिल्लाबाट जनार्दन शर्मा प्रभाकरलाई आगामी प्रतिनिधि सभा सदस्य निर्वाचनका लागि एकल सिफारिस गरेको छ । पार्टीका संरक्षक समेत रहनुभएका शर्मालाई पार्टीले फागुन २१ गतेको प्रतिनिधि सभा सदस्य निर्वाचनका लागि एकल उम्मेदवारका रूपमा सिफारिस गरेको हो । यो सँगै जनार्दन शर्मा आगामी निर्वाचन लड्ने वा नलड्ने भन्ने अन्यौलता हटेको छ ।

नेकपा माओवादी केन्द्र र नेकपा एकीकृत समाजवादी लगायतका दल बिचमा भएको एकतामा सहभागी नभई प्रगतिशील लोकतान्त्रिक पार्टी निर्माणमा जुट्नुभएका शर्मा रुकुम पश्चिमबाट चुनाव लड्नु हुन्छ वा हुँदैन भन्ने अन्यौलता थियो । पार्टीले हालसम्म पनि कसैलाई सिफारिस नगरेको अवस्थामा त्यो अन्यौलता झनै बढेको थियो ।

तर आज पार्टी कार्यालय मुसिकोट खलङ्गामा बसेको पार्टीको बैठकले शर्मालाई प्रतिनिधि सभा सदस्यमा सिफारिस गरेको हो । सर्वसम्मत रूपमा उहाँलाई एकल सिफारिस गरिएको प्रलोपाका जिल्ला इन्चार्ज गोरखबहादुर केसी सन्देशले जानकारी दिनुभयो ।

अब जिल्लाको निर्वाचन रोचक हुने देखिएको छ । तत्कालीन नेकपा माओवादी केन्द्रबाट २०६४ सालदेखि लगातार चुनाव जितिरहनुभएका शर्मा आगामी निर्वाचनमा भने फरक पार्टी र फरक चुनाव चिन्हबाट चुनाव लड्नुहुने भएको छ । नेपाली कम्युनिस्ट पार्टीले पनि यस अघि नै एकल रूपमा गोपाल शर्मा अनललाई सिफारिस गरिसकेको छ ।

बर्षाैँ एउटै पार्टीमा रहनुभएका प्रभाकर र अनल बिचको प्रतिस्पर्धाले निर्वाचनलाई थप रोचक बनाउने भएको छ । नेपाली काँग्रेस, नेकपा एमाले लगायतका दलले पनि सिफारिस गरिसकेका छन् । काँग्रेसले पुराना नेता गोपालजिजंग शाह र जिल्ला सभापति प्रेमप्रकाश ओलीलाई सिफारिस गरेको छ भने नेकपा एमालेले जिल्ला अध्यक्ष नन्दराम देवकोटालाई सिफारिस गरेको छ । नेकपा माओवादीले चन्द्र सी लाई सिफारिस गरेको छ ।