नेपाली काँग्रेस रुकुम पश्चिमका क्षेत्रीय प्रतिनिधि तथा रुकुमका भूतपूर्व जिल्ला पञ्चायत उपसभापति डिल्लीरमण खड्का राष्ट्रिय प्रजातन्त्र पार्टीमा प्रवेश गर्नुभएको छ । राप्रपा रुकुम पश्चिमको पार्टी कार्यालय मुसिकोटमा एक कार्यक्रमका बिच खड्का सहित २१ जना राप्रपामा प्रवेश गरेका हुन् ।

नेपाली काँग्रेस सहित विभिन्न पार्टीबाट २१ जनाले राप्रपामा प्रवेश गरेको राप्रपाका रुकुम पश्चिम प्रतिनिधि सभा सदस्यका उम्मेदवार गोपाल खड्काले जानकारी दिनुभयो । नव प्रवेशीहरुलाई राप्रपाका केन्द्रीय सदस्य दीपककुमार मल्लले स्वागत गर्नुभयो ।

राष्ट्रवादी शक्तिहरू एक हुनुपर्ने अवस्था आएको र नेपाली काँग्रेस विधि र सिद्धान्तमा नचलेको तथा राष्ट्रियताको मामिलामा कमजोर बनेपछि राप्रपामा प्रवेश गरेको खड्काले बताउनुभयो ।

यसैबिच राप्रपा रुकुम पश्चिमले फागुन २१ गतेको निर्वाचनलाई लक्षित गरेर चुनावी प्रचारलाई तीव्रता दिएको छ । उसले जिल्लाभरमा चुनावी प्रचार भइरहेको जनाएको छ । उम्मेदवार सहितको टोली जिल्लाका विभिन्न ठाउँमा पुगेर मत मागिरहेको राप्रपाले जनाएको छ ।

जिल्लाका सबै पालिकामा पुगिसकेको र अहिले पनि घरदैलोमै रहेको उम्मेदवार खड्काले जानकारी गराउनुभयो । टोल तथा घरघरमै पुगेर चुनावी प्रचार गरिरहेको उहाँले बताउनुभयो । निर्वाचन प्रचारका क्रममा जनतामा राम्रो माहौल पाएको उहाँको भनाई छ । यस पटकको निर्वाचनमा रुकुम पश्चिममा राप्रपा राम्रो अवस्थामा रहेको पाएको उहाँले बताउनुभयो ।।