रुकुम पश्चिममा अलपत्र आयोजना पूरा गर्न सरकारलाई सांसद शर्माको ध्यानाकर्षण  

रुकुम पश्चिमबाट प्रतिनिधि सभा सदस्य गोपाल शर्मा अनलले जिल्लामा अलपत्र अवस्थामा रहेका आयोजनाहरूको पूर्णताको माग गर्नुभएको छ । आज संसद्को शून्य समयमा बोल्दै उहाँले जिल्लामा विभिन्न आयोजनाहरू अलपत्र अवस्थामा रहेको भन्दै उक्त आयोजनाहरूको पूर्णताका लागि सरकारको ध्यानाकर्षण गराउनुभयो । 

सङ्घीय सरकारको मातहतमा रहेका जिल्लाका अति आवश्यक आयोजनाहरू समयमै सम्पन्न नहुँदा जनताले सास्ती बेहोर्नुपरेको भन्दै उहाँले सरकारको ध्यानाकर्षण गराउनुभएको हो । उहाँले मध्य पहाडी लोक मार्ग अन्तर्गतको चौरजहारी भेरी पुल, ठुली भेरीको रग्दा र सानीभेरीको मेघा सडक पुल अलपत्र रहेको भन्दै सरकारको ध्यानाकर्षण गराउनुभएको छ ।

त्यस्तै मुसिकोट–चौखावाङ सडक समेत अलपत्र अवस्थामा रहेको भन्दै उहाँले अलपत्र अवस्थामा रहेका यस्ता आयोजनाको समयमै निर्माण सम्पन्न गर्न सरकारलाई ध्यानाकर्षण गराउनुभयो । 

उहाँले स्वास्थ्य बिमाको रकम उपलब्ध गराउन समेत सरकार समक्ष माग गर्नुभएको छ । स्वास्थ्य बिमा बोर्डले जिल्लाका अस्पताललाई ११ करोड भुक्तानी नगर्दा अस्पताल सञ्चालनमा समस्या भएको भन्दै उहाँले तत्काल दाबी रकम भुक्तानी गर्न समेत सरकारको ध्यानाकर्षण गराउनुभएको हो ।

प्रकाशित मिति: सोमबार, जेठ ४, २०८३  १७:३१
प्रतिक्रिया दिनुहोस्
Weather Update