१९ औँ गणतन्त्र दिवस २०८३ को अवसरमा रुकुम पश्चिममा आयोजित जिल्ला स्तरीय विद्यालय तहका विद्यार्थीहरूको प्रतिभा पहिचान कार्यक्रम सम्पन्न भएको छ । सामाजिक विकास कार्यालय, रुकुम पश्चिमको आयोजनामा यमुना नन्द नमुना माध्यमिक विद्यालय, मुसिकोट–५ सेरीगाउँमा “विज्ञान प्रदर्शनी तथा चित्रकला प्रतियोगिता” भएकाे हो । 

कार्यक्रममा जिल्लाका विभिन्न विद्यालयका विद्यार्थीहरूको सहभागिता रहेको थियो । कार्यक्रममा जिल्ला समन्वय समिति प्रमुख लुम्बिनी गौतमको प्रमुख र प्रमुख जिल्ला अधिकारी निशानराज गौतमको विशेष उपस्थिति रहेको थियो । कार्यक्रमको अध्यक्षता सामाजिक विकास कार्यालयका प्रमुख इ. मितलेशकुमार यादवले गर्नुभएको थियो । 

विज्ञान प्रदर्शनीतर्फ विद्यार्थीहरूले वैज्ञानिक सोच, नवप्रवर्तन तथा सृजनशीलता झल्किने विभिन्न सामग्री प्रस्तुत गरेका थिए । भने चित्रकला प्रतियोगितामा सामाजिक, शैक्षिक तथा राष्ट्रिय विषयवस्तु समेटिएका आकर्षक चित्रहरू प्रदर्शन गरिएको थियो । प्रतियोगिता अन्तर्गत चित्रकलामा विजयश्वरी बोर्डिङ स्कुलका शिरीष खड्का र विज्ञान प्रदर्शनी तर्फ हिमालय नमुना माध्यमिक विद्यालय, चौरजहारीकी करुणा के.सी. र प्रमीला ओली प्रथम स्थान हासिल गरेका छन् ।

सामाजिक विकास कार्यालयले छनोट भएका विद्यार्थीहरूलाई प्रदेश स्तरीय कार्यक्रममा सहभागिताका लागि सिफारिस गरिएको सामाजिक विकास कार्यालयका प्रमुख यादवले जानकारी दिनुभयो । कार्यक्रमले विद्यार्थीहरूमा आत्मविश्वास वृद्धि गर्नुका साथै विज्ञान, कला र सृजनशीलताप्रति थप प्रेरणा मिलेको सहभागी विद्यालयका शिक्षकहरूले बताएका छन् ।