काठमाडौँमा भएको दोस्रो मिस्टर महानगर बडी विल्डिङ (शारीरिक सुगठन) च्याम्पियनसिप २०८३ मा रुकुम पश्चिमकी तिलसरा बुढाथोकी तेस्रो भएकी छन् । काठमाडौं वडा नम्बर २२ ले आयोजना गरेको प्रतियोगितामा महिला तर्फ ८ जनाले प्रतिस्पर्धा गरेकामा नेपाल आर्मीकी बुढाथोकी तेस्रो भएकी हुन् । उनी जिल्लाको त्रिवेणी गाउँपालिका वडा नम्बर २ बिमैचा निवासी हुन् । उनी हाल नेपाल आर्मीमा आबद्ध छिन् ।

प्रतियोगिता काठमाडौँमा अवस्थित राष्ट्रिय सभागृहमा भएको थियो । यो सफलताले आफूलाई थप उत्साहित बनाएको र हौसला थपिएको बुढाथोकीले बताउनुभयो । नेपालको सन्दर्भमा छोरी मान्छे शारीरिक सुगठनमा लाग्ने सहज वातावरण नभएको र लाग्दा समाजले हेर्ने नजर फरक भए पनि आफ्नो इच्छा अनुसार यसमा आकर्षित भएको उहाँको भनाई छ ।

रुकुमबाट नेपाल आर्मी हुँदै यहाँसम्मको यात्रा सजिलो भने नरहेको उहाँले बताउनुभयो । अहिले पनि छोरीलाई विभेदकारी नजरले हेर्ने गरिएको भए पनि आफूले त्यसलाई केही हदसम्म तोड्न सफल भएको उहाँको बुझाई छ ।  प्रतियोगितामा उत्कृष्ट प्रदर्शन गर्दै तेस्राे स्थान प्राप्त गरेपछि प्रशिक्षक रमेश लिम्बुले  बधाई व्यक्त गर्दै छोटो समयको तयारीमै प्राप्त यो सफलता बुढाथोकीको लागि कडा मेहनत, अनुशासन र समर्पणको परिणाम भएको बताउनुभएको छ । आफ्नो पहिलो प्रतियोगितामा उत्कष्ट प्रदर्शन गर्दै बलिया प्रतिस्पर्धीका विच तेस्रो स्थान हासिल गरेकाेमा प्रशिक्षक लिम्बुले खुसी व्यक्त गर्नुभएको छ ।