जिल्ला प्रशासन कार्यालय रुकुम पश्चिमले जेठ महिनामा नागरिकता, राहदानी तथा राष्ट्रिय परिचयपत्रलगायत विभिन्न सेवामार्फत हजारौँ सेवाग्राहीलाई सेवा प्रदान गरेको छ । कार्यालय एक महिनाको अवधिमा झन्डै तीन हजार सेवाग्राहीलाई सेवा प्रदान गरेको हो । जेठ महिनाभर सबैभन्दा धेरै राष्ट्रिय परिचयपत्र सम्बन्धी सेवा प्रवाह भएको प्रमुख जिल्ला अधिकारी निशानराज गौतमले जानकारी दिनुभयो । उहाँका अनुसार जेठ महिनामा मात्र २८ सय २४ जनालाई सेवा प्रदान गरिएको छ । उक्त अवधिमा १ हजार २३४ जनाले राष्ट्रिय परिचयपत्रका लागि विवरण दर्ता गराएका छन् भने १५१ जनालाई राष्ट्रिय परिचयपत्र वितरण गरिएको छ । 

त्यस्तै नयाँ नागरिकता तर्फ  ३४१ पुरुष र ३४३ महिला गरेर कुल ६ सय ८४ जनाले सेवा लिएका छन् । प्रतिलिपि नागरिकता सेवा अन्तर्गत ३०३ जनालाई प्रतिलिपि नागरिकता वितरण गरिएको छ । जसमा १६५ पुरुष र १३८ महिला लाभान्वित भएको प्रजिअ गौतमले जानकारी दिनुभयो । विदेश यात्रा तथा अन्य प्रयोजनका लागि आवश्यक राहदानी सेवातर्फ पनि नागरिकको चाप बढेको उहाँको भनाई छ । जेठ महिनामा मात्र २४५ जनाले राहदानी बनाएका थिए । जसमा १४४ पुरुष र १०१ जना महिला रहेकामा २०७ जनाले राहदानी लिइसकेका छन् भने ३८ जनाले राहदानी लिन बाँकी रहेको उहाँको भनाई छ । 

पछिल्लो समय विभिन्न सरकारी सेवामा राष्ट्रिय परिचयपत्रको प्रयोग बढ्दै जाँदा यसको विवरण दर्ता र कार्ड प्राप्त गर्नेको सङ्ख्या उल्लेख्य रूपमा बढेको  प्रमुख जिल्ला अधिकारी गौतमले बताउनुभयो । कार्यालयले सेवा प्रवाहलाई थप प्रभावकारी, सहज र छिटो बनाउन निरन्तर प्रयास गरिरहेको उहाँको भनाई छ । जिल्ला प्रशासन कार्यालयले पछिल्लो केही समयदेखि जिल्ला प्रशासन र इलाका प्रशासन कार्यालय चौरजहारीबाट हुने दैनिक सेवा प्रवाहलाई नियमित रूपमा सार्वजनिक गर्दै आएको छ । यसले गर्दा सेवा प्रवाहको जानकारी लिन सर्वसाधारणलाई समेत सहज भएको छ ।