रुकुम पश्चिममा चालु आर्थिक वर्षको हालसम्म सवारी कारबाहीबाट साढे २८ लाख राजस्व सङ्कलन भएको छ । जिल्ला ट्राफिक प्रहरी कार्यालयले जिल्लाभरमा सवारी कारबाहीबाट साउन देखि हालसम्म २८ लाख ६७ हजार राजस्व सङ्कलन गरेको हो । 

यो अवधिमा जिल्लामा ट्राफिक नियम उल्लङ्घन गर्ने ३ हजार २ सय ३४ सवारी साधन कारबाहीमा परेको जिल्ला ट्राफिक प्रहरी कार्यालयका इन्चार्ज नवीन अधिकारीले जानकारी दिनुभयो । कारबाहीमा पर्नेमा सबैभन्दा बढी मोटरसाइकल रहेको उहाँले बताउनुभयो । 

जिल्लामा सबै खालका सवारी साधन ट्राफिक नियम उल्लङ्घन गरे बापत कारबाहीमा परेको उहाँको भनाई छ । क्षमता भन्दा बढी यात्रु बोक्ने, कागजात नभएका, रुट परमिट नभएका, तीव्र गति लगायतका ट्राफिक नियम उल्लङ्घन गर्ने सवारी साधन कारबाहीमा परेको बताइएको छ । 

साथै जिल्लामा मादक पदार्थ सेवन गरी सवारी चलाउने क्रम बढ्दो पाइएको छ । यो अवधिमा जिल्लामा मापसे गरी सवारी चलाउने २ सय ३५ जना चालक कारबाहीमा परेका छन् । उनीहरूबाट मात्र ट्राफिक प्रहरीले १ लाख ३८ हजार राजस्व सङ्कलन गरेको छ । 

जिल्लामा सवारी चाप, साँघुरा सडक, ट्राफिक सचेतनामा कमी लगायतका चुनौतीहरू रहेको र यसले दुर्घटनाको जोखिम तथा सवारी अस्तव्यस्तता थपिँदै गएको जिल्ला ट्राफिक प्रहरी इन्चार्ज अधिकारीले जानकारी गराउनुभयो । 

उहाँका अनुसार यिनै समस्यालाई मध्यनजर गर्दै ट्राफिक प्रहरीले सचेतनाका कार्यक्रममा समेत जोड दिएको छ । चालु आर्थिक वर्षको साउन देखि हालसम्म जिल्ला भरमा ८ सय ४१ वटा ट्राफिक सचेतना सम्बन्धी कार्यक्रम सञ्चालन गरिएको छ । 

जसबाट कुल ६४ हजार ९० जना नागरिक समेटिएका छन् । यसमा महिला २० हजार ३ सय ८८, पुरुष २३ हजार ३ सय ८७, बालक १० हजार ६ सय ८० र बालिका ९ हजार ६ सय ३५ जना रहेको अधिकारीले बताउनुभयो ।