जिल्ला प्रहरी कार्यालय रुकुम पश्चिमले आर्थिक वर्ष २०८२/०८३ मा सम्पादन गरेका प्रमुख कार्य तथा उपलब्धिहरू सार्वजनिक गरेको छ । आज जिल्ला प्रहरी कार्यालयमा पत्रकार भेटघाट कार्यक्रम आयोजना गरी वर्षभरी गरेका उपलब्धिहरु सार्वजजिक गरेको हो ।  अपराध अनुसन्धान, फरार प्रतिवादी पक्राउ, लागूऔषध नियन्त्रण, महिला तथा बालबालिका संरक्षण, प्राकृतिक स्रोतको संरक्षण र समुदाय–प्रहरी साझेदारीका क्षेत्रमा उल्लेखनीय उपलब्धि हासिल गरिएको जिल्ला प्रहरी कार्यालय रुकुम पश्चिमका कार्यालय प्रमुख प्रहरी नायव उपरीक्षक देवबहादुर पौडेलले बताउनुभयो । 

उहाँका अनुसार गत आर्थिक वर्षभर २२३ वटा अपराधका मुुद्धा दर्ता भएका छन् ।  तीमध्ये ४१ वटा जघन्य तथा गम्भीर अपराध, २३ वटा महिला, बालबालिका तथा ज्येष्ठ नागरिकसँग सम्बन्धित अपराध, ३३ वटा आर्थिक अपराध र १४९ वटा अन्य अपराध रहेका छन् । यस अवधिमा चालु मुद्दाका १३३ जना प्रतिवादी पक्राउ परेका छन् भने ४ वटा सार्वजनिक चासोका पेन्डिङ मुद्दा सफलतापूर्वक अनुसन्धान सम्पन्न गरिएको उहाँले बताउनुभयो ।

फैसला कार्यान्वयनतर्फ ७८ जना फरार प्रतिवादी पक्राउ गरिएको छ । उनीहरूबाट ६२ वर्ष ८ महिना ४ दिन कैद सजाय कार्यान्वयन गराइएको छ भने १ लाख ६० हजार ४५० रुपैयाँ १६ पैसा जरिवाना असुल गरिएको छ । लागूऔषध नियन्त्रणतर्फ ८ वटा मुद्दा दर्ता गरी १७ जना पक्राउ गरिएको छ । यस क्रममा अफिम १० केजी १६० ग्राम, ब्राउन सुगर १३.६० ग्राम, चरेस/गाँजा २९.८४ ग्राम तथा ट्रामाडोल २१० ट्याब्लेट बरामद गरिएको छ । साथै चालु आर्थिक वर्षको सुरुवातमै ३.१७ किलोग्राम अफिमसहित २ जना पक्राउ परेका छन् । महिला, बालबालिका तथा ज्येष्ठ नागरिक सेवा केन्द्रमार्फत हराएका १३९ जनामध्ये १३६ जना फेला, ३ जना खोजीमाको  अभिलेख राखिएको छ ।

घरेलु हिंसासम्बन्धी ५९ उजुरी मध्ये ४६ वटा मिलापत्र, ५ वटा अदालतमा र ८ वटा स्थानीय तहमा पठाइएको छ । ठाडो उजुरी १७८ वटा प्राप्त भएका सबै फछ्र्योट गरिएको प्रहरीले जनाएको छ । प्राकृतिक सम्पदा संरक्षणअन्तर्गत नदीजन्य पदार्थको अवैध ओसारपसार नियन्त्रणमा ६ टिपर र ११ ट्र्याक्टर नियन्त्रणमा लिई रु. १ लाख २१ हजार जरिवाना गरिएको तथा १७ जना पक्राउ परेका छन् ।  यस्तै अवैध वन पैदावार चोरी–पैठारी नियन्त्रणका क्रममा २७७.२५ क्यु फिट काठ बरामद गरिएको छ, जसको अनुमानित मूल्य रु. २ लाख ७९ हजार ४८ रुपैयाँ रहेको छ ।

समुदाय–प्रहरी साझेदारी कार्यक्रमअन्तर्गत ५३६ वटा समुदाय केन्द्रित कार्यक्रम सञ्चालन गरिएको, जसमा १५,२२१ जना सहभागी भएका छन् । ९९ वटा विद्यालय लक्षित कार्यक्रम मार्फत ६ हजार ६१३ जना विद्यार्थी लाभान्वित भएका छन् ।  त्यसैगरी ४ वटा सार्वजनिक÷नागरिक सुनुवाइ कार्यक्रम मा ३२५ जना सहभागी भएका छन् भने सीमान्तकृत, अल्पसंख्यक र पिछडिएका वर्ग लक्षित १५ वटा कार्यक्रम सञ्चालन गरी ३३१ जना लाभान्वित भएको जिल्ला प्रहरी कार्यालय रुकुमले सर्वजनिक गरेको प्रगति विरणमा उल्लेख गरिएको छ ।