जिल्ला प्रहरी कार्यालय रुकुम पश्चिममा कैदी बन्दीको सुरक्षित ओसारपसारका लागि सुविधा सम्पन्न नयाँ प्रहरी सवारीसाधन ल्याइएको छ । केही दिन अगाडी नयाँ सुविधा सम्पन्न नयाँ सवारी साधन ल्याएको हो ।  प्रहरी कार्यालयमा भित्रिएको नयाँ गाडीमा अगाडि र पछाडितर्फ सिसी क्यामेरा जडान गरिएको छ ।

यसका साथै गाडीका सिसामा सुरक्षालाई मध्यनजर गर्दै बलियो फलामको जाली राखिएको छ, जसले कैदी बन्दीको सुरक्षित व्यवस्थापन तथा प्रहरीको सुरक्षा थप मजबुत बनाउने जिल्ला प्रहरी कार्यालय रुकुम पश्चिमले जनाएको छ । 

गाडी विशेष रूपमा कैदी बन्दी ओसारपसारका लागि डिजाइन गरिएको छ । गाडीमा प्रहरीको आपत्कालीन बत्ती (लाइट बार), सुरक्षा जाली तथा निगरानी प्रणाली जडान गरिएकाले कैदी बन्दीलाई एक स्थानबाट अर्को स्थानमा लैजाँदा निगरानी र सुरक्षा व्यवस्था थप प्रभावकारी  हुने जिल्ला प्रहरी कार्यालय रुकुम पश्चिमका प्रहरी प्रमुख प्रहरी नायव उपरीक्षक वेदबहादुर पौडेलले जानकारी दिनुभयो ।

उहाँका अनुसार नयाँ सवारी सञ्चालनमा आएपछि कैदी बन्दी ढुवानी कार्य थप व्यवस्थित, सुरक्षित र प्रभावकारी हुने छ । नयाँ प्रविधिसहितको यो सवारीले प्रहरीको सेवा प्रवाह तथा सुरक्षा व्यवस्थापनमा समेत सकारात्मक योगदान पुग्ने जिल्ला प्रहरी कार्यालय रुकुम पश्चिमले जनाएको छ ।