स्वावलम्बन लघुवित्त वित्तीय संस्था लिमिटेड शाखा कार्यालय, मुसिकोट, रुकुम पश्चिमले एक विद्यालयमा खानेपानी फिल्टर वितरण गरेको छ । आफ्नो सामाजिक उत्तरदायित्व अन्तर्गत बाँफिकोट गाउँपालिका १० पुरानो ठाँटीमा रहेको मच्छिन्द्र आधारभूत विद्यालयमा पानी शुद्धीकरण गर्ने दुई वटा फिल्टर वितरण गरेको हो । 

बाफिकोट गाउँपालिकाका उपाध्यक्ष तारा बुढा केसीको प्रमुख आतिथ्यता तथा स्वावलम्बन लघुवित्त वित्तीय संस्था लिमिटेड केन्द्र नम्बर २७ की प्रमुख रमिता चन्द मल्ल, स्वावलम्बन लघुवित्त वित्तीय संस्था शाखा कार्यालय रुकुम पश्चिमका प्रमुख पदम विकको विशेष उपस्थितिमा विद्यालयलाई फिल्टर हस्तान्तरण गरियो । 

त्यस्तै उक्त कार्यक्रममा विद्यालय व्यवस्थापन समितिका अध्यक्ष पर्णबहादुर नेपाली, प्रधानाध्यापक पृथ्वीनारायण चन्द, शिक्षक, अभिभावक, विद्यार्थी, स्थानीय भद्र भलादमीको समेत उपस्थिति रहेको थियो । कार्यक्रमको व्यवस्थापन संस्थाका कर्मचारी दिनेश शर्मा, डिलबहादुर विश्वकर्मा, तेजबहादुर खत्रीले गर्नु भएको थियो ।

विद्यालयमा अध्ययनरत विद्यार्थीहरूलाई स्वच्छ तथा सुरक्षित खानेपानीको पहुँचमा पुर्‍याउने उद्देश्यले खानेपानी शुद्धीकरण गर्ने फिल्टर वितरण गरिएको संस्थाले जनाएको छ । विद्यालयमा स्वच्छ खानेपानीको व्यवस्थाले विद्यार्थीहरूको स्वास्थ्य, सरसफाइ तथा नियमित पठनपाठनमा महत्त्वपूर्ण टेवा पुग्ने भन्दै संस्थाले सामाजिक उत्तरदायित्व अन्तर्गत फिल्टर सामग्री सहयोग गरेको बताएको छ । 

साथै स्वच्छ पानीको प्रयोगले विद्यार्थी तथा विद्यालय परिवारको स्वास्थ्यमा सकारात्मक प्रभाव पार्नुका साथै पानीजन्य रोगको जोखिम न्यूनीकरण गर्न समेत सहयोग पुग्ने अपेक्षा गरिएको छ ।

सामाजिक उत्तरदायित्वअन्तर्गत गरिएको यस सहयोगले विद्यालयको भौतिक तथा स्वास्थ्यसम्बन्धी आवश्यकतामा केही हदसम्म सहयोग पुग्नुका साथै विद्यार्थीहरूमा स्वच्छ खानेपानी तथा सरसफाइको महत्वबारे सकारात्मक सन्देश प्रवाह गरेको संस्थाको भनाई छ । 

विद्यालय परिवारले संस्थाले गरेको सहयोगप्रति आभार व्यक्त गर्दै आगामी दिनमा पनि यस्ता सामाजिक तथा शैक्षिक क्षेत्रमा सहयोग निरन्तर रहने अपेक्षा व्यक्त गरेको छ ।

स्वावलम्बन लघुवित्त वित्तीय संस्था लिमिटेडले वित्तीय सेवा प्रवाहसँगै समुदायको आवश्यकता र हितलाई ध्यानमा राख्दै विभिन्न सामाजिक उत्तरदायित्वका कार्यक्रमहरू सञ्चालन गर्दै आएको छ । मुसिकोट शाखाबाट गरिएको यो सहयोग संस्थाको समुदायप्रतिको सामाजिक जिम्मेवारी र सेवा भावको एउटा उदाहरण हो ।

यस कार्यक्रमले विद्यार्थीहरूलाई स्वच्छ र सुरक्षित खानेपानीको प्रयोगमा सहयोग पुर्‍याउनुका साथै संस्था र स्थानीय समुदायबिचको सम्बन्धलाई अझ मजबुत बनाउन महत्त्वपूर्ण भूमिका खेलेको संस्थाको विश्वास छ । 

आगामी दिनमा पनि स्थानीय समुदाय, विद्यालय तथा आवश्यकतामा रहेका वर्गको हितलाई केन्द्रमा राखी यस्ता उपयोगी तथा प्रभावकारी सामाजिक कार्यक्रमहरूलाई निरन्तरता दिने संस्थाले जनाएको छ ।