रुकुम पश्चिमको मुसिकोट खलङ्गा खानेपानी तथा सरसफाइ संस्थाले भोटेकोसी बाढी पीडितका लागि सहयोग गर्ने निर्णय गरेको छ । संस्थाको आज बसेको बैठकले बाढी पीडितका लागि १० हजार एक सय एक रुपैयाँ सहयोग गर्ने निर्णय गरेको हो । 

भोली प्रधानमन्त्री दैवी प्रकोप उद्धार कोषमा उक्त रकम जम्मा गर्ने निर्णय भएको संस्थाका अध्यक्ष महेन्द्रराज गौतमले जानकारी दिनुभयो । विपद्मा परेका नागरिकहरूको उद्धार, पुनः स्थापना तथा परिपूरणमा सहयोग पुगोस् भन्ने उद्देश्यले सरकारको खातामा उक्त रकम सहयोग गर्ने निर्णय भएको उहाँले बताउनुभयो । 

संस्थाको उत्तरदायित्व अन्तर्गत सहयोग गर्ने निर्णय भएको बताउँदै उहाँले यसले विपद्को घडीमा सानो भए पनि मलहम लगाउने विश्वास व्यक्त गर्नुभयो । कोषमा देश तथा विदेशबाट सहयोग सङ्कलन भइरहेको छ ।