रुकुम पश्चिमका सफल व्यवसायी तथा समाजसेवी मोहवीर खड्काले भोटेकोशी बाढीपीडितको उद्धार, राहत तथा पुनर्स्थापनाका लागि एक लाख रुपैयाँ आर्थिक सहयोग गर्नुभएको छ । जिल्लाको मुसिकोट नगरपालिका–१४ निवासी भई हाल खलंगामा व्यवसाय सञ्चालन गर्दै आउनुभएका खड्काले प्रधानमन्त्री दैवी प्रकोप उद्धार कोषमा उक्त रकम जम्मा गर्नुभएको हो । उहाँ नेपाली कांग्रेसका कोषाध्यक्षसमेत हुनुहुन्छ ।

विपद्को पीडादायी घडीमा प्रभावित नागरिकको उद्धार तथा राहतमा सहयोग पुर्‍याउने उद्देश्यले आफूले आशा ट्रेडर्सको तर्फबाट सहयोग गरेको खड्काले बताउनुभयो । “थोपा–थोपा मिलेर सागर बन्छ,” उहाँले भन्नुभयो, “सानो सहयोगले पनि विपद्मा परेका नागरिकको जीवनमा ठूलो आशा जगाउन उहाँको भनाइ छ । खड्काले विपद्को समयमा सबै नागरिक एकजुट भएर पीडितको साथमा उभिनुपर्ने बताउँदै दुःखमा परेकाहरूलाई सक्दो सहयोग गर्नु सबैको साझा दायित्व भएको बताउनुभयो ।

“विपद् कसैको व्यक्तिगत समस्या होइन, यस्तो बेला मानवीयता देखाउँदै हातेमालो गर्नु आवश्यक छ,” उहाँले भन्नुभयो । सहयोगी भावना र सामाजिक उत्तरदायित्वलाई आत्मसात गर्दै गरिएको उक्त सहयोगले बाढीपीडितको राहत तथा पुनर्स्थापनामा केही भए पनि टेवा पुग्ने उहाँको  विश्वास छ  । यसैबीच, खड्काले भोटेकोशी बाढीका कारण ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्नुभएको छ । साथै उहाँले घाइतेहरूको शीघ्र स्वास्थ्यलाभको कामनासमेत गर्नुभएको छ।