भाद्र १० गते भोटेकोसीमा आएको बाढीमा बेपत्ता रुकुम पश्चिमकी एक युवतिको कुशको शव बनाएर अन्त्येष्टि गरिएको छ । जिल्लाको चौरजहारी नगरपालिका वडा नम्बर ३ की २१ बर्सिया सीमा बुढाको शव नभेटिएपछि परिवार तथा आफन्तले आज पशुपति आर्यघाट काठमाडौँमा कुशको शव बनाएर अन्त्येष्टि गरेका हुन् । 

बेपत्ता भएको १६ औँ दिनमा सीमाको अन्त्येष्टि गरिएको हो । खोजी गर्दा जीवित तथा मृत फेला नपरेपछि अब भेटिने आस मारेका परिवारजनले सीमाको अन्त्येष्टि गरेका हुन् । बुवा चन्द्र बुढाले कुशको शवमा दागबत्ती दिएको रुकुमेली सेवा समाजका लोकेन्द्र खनालले जानकारी दिनुभयो । 

अत्येष्टिमा परिवारजन, आफन्त तथा जिल्लावासीको सहभागिता रहेको उहाँले बताउनुभयो । सीमा स्वास्थ्यकर्मी हुनुहुन्थ्यो । उहाँले काठमाडौँस्थित मोडल अस्पतालमा स्टाफ नर्समा नाम निकाल्नुभएको थियो भने भाद्र १४ गतेबाट काममा जोडिने चरणमा हुनुहुन्थ्यो । सीमा उहाँ जिल्ला अस्पताल रसुवा अन्तर्गत बोर्डर नजिकको स्वास्थ्य चौकीमा कार्यरत काकी ललिता कुमाईलाई भेट्न जानुभएको थियो । 

सो क्रममा रसुवागढीको होटेल माउन्ट भ्युमा बसिरहेको अवस्थामा काकी र काकीकी छोरी बर्निता सेजवाल सहित सीमा विनाशकारी बाढीमा परेर बेपत्ता हुनुभएको हो । सीमा बुवा चन्द्र बुढा र आमा जुनकुमारी कुमाईकी कान्छी छोरी हुनुहुन्थ्यो भने उहाँका दुई दाइ रहेका छन् ।

भोटेकोसी बाढीमा परेर बेपत्ता भएकाहरूको शव फेला नपरेपछि परिवारजनले कुशको शव बनाएर अन्त्येष्टि गरिरहेका छन् । जीवित फेला पर्ने आस मरेपछि परिवारले धार्मिक विधि अनुसार अन्त्येष्टि गरिरहेका हुन् । यसअघि रसुवा भन्सार कार्यालयमा कार्यरत नायब सुब्बा मुसिकोट २ का हरिबहादुर खड्काको पनि कुशको शव बनाएर अन्त्येष्टि गरिएको थियो । 

हिन्दु धर्म संस्कार अनुसार कुनै पनि व्यक्ति बेपत्ता भएको लामो समयसम्म फेला नपरेमा वा शव प्राप्त हुने अवस्था नभएमा कुशको शव बनाएर दाहसंस्कार गर्ने परम्परा रहेको छ । यो विधिले मृतकको आत्मालाई मुक्ति मिल्ने र परिवारलाई मानसिक शान्ति मिल्ने धार्मिक विश्वास छ ।