रुकुम पश्चिमको बाफिकोट गाउँपालिका–६, मग्मा तलिगाउँ घर भई हाल अमेरिकाको क्यालिफोर्नियामा बस्दै आउनुभएका लक्ष्मण पुनमगरले आफ्ना स्वर्गीय बुवा वीरबहादुर पुनमगरको सम्झनामा बुद्धभूमि मानव सेवा आश्रममा आश्रित व्यक्तिहरूलाई खाना खुवाउनुभएको छ । कुशे औँसी अर्थात् बाबुको मुख हेर्ने दिनको अवसरमा उहाँले आश्रममा भोजन सेवा गर्नुभएको हो । बुवाको निधन भएको करिब दुई वर्ष पूरा भए पनि उहाँको माया, सम्झना र संस्कारलाई मनमा राख्दै पुनमगरले मानवीय सेवामार्फत बुवाप्रतिको प्रेम तथा सम्मान गर्दै  खाना  खुवाएर सहयोग गर्नुभएको हो ।

त्यस्तै आश्रममा निर्माण भइरहेको नयाँ भवनका लागि मुसिकोट नगरपालिका १ खलंगा घरभइ हाल काठमाडौ बस्दै आउनुभएका चिन्ताबहादुर खड्काले १० हजार १५१ नगद रकम सहयोग गर्नुभएको छ । आश्रममै पुगेर खड्को तर्फबाट शिखर इन्स्योरेन्स लिमिटेड मुसिकोट शाखा प्रमुख भद्रबहादुर खड्काले आश्रमका अध्यक्ष खम्बबहादुर जैसीलाई नगद रकम हस्तान्तरण गर्नुभएको हो । त्यस्तैगरी कुशे औशी तथा बुवाको मुख हेर्ने दिनको अवसरमा मुसिकोट नगरपालिका ५ बागबजार निवासी सुमना श्रेष्ठ कँवरले पनि २ हजार ५०५ रुपैयाँ आश्रमलाई सहयोग गर्नुभएको छ ।

पछिल्लो समय खाद्यान्न, आश्रमलाई आवश्यक पर्ने अन्य सामग्रीसहित भवन निर्माणको लागि नगद रकम समेत सहयोग भइरहेको बुद्धभुमि मानव सेवा आश्रम रुकुम पश्चिमले जनाएको छ । हाल आश्रममा १० जना व्यक्ति आश्रय लिएर बसिरहेका छन् ।