गत वर्षको भदौ २४ गते नवयुवा आन्दोलनको फाइदा उठाएर फरार रहेका मध्ये रुकुम पश्चिममा अझै १६ जना कैदी बन्दी कारागार बाहिरै छन् । कारागार तोडेर भागेका ८८ जना कैदी बन्दी मध्ये १६ जना कैदी बन्दी अझै फरार रहेको जिल्ला प्रहरी कार्यालय रुकुम पश्चिमले जनाएको छ ।
कार्यालयका सूचना अधिकारी प्रहरी निरीक्षक हेमन्त गिरीका अनुसार फरार मध्ये ७२ जना पक्राउ परेका छन् । बिहिबार बाँफिकोट गाउँपालिका वडा नम्बर २ का दुर्गालाल परियार पक्राउ परेका छन् । कारागार तोडेर भारत पुगेका उनी घर आएर लुकेर बसेको अवस्थामा प्रहरीले उनलाई घरबाटै पक्राउ गरेको हो ।
यो संगै कारागार तोडेर फरार भएका मध्ये पक्राउ पर्नेको संख्या ७२ जना पुगेको प्रहरी निरीक्षक गिरीले जानकारी गराउनुभयो । ती मध्ये केही आफै कारागार फर्किएका हुन भने अधिकांशलाई प्रहरीले पक्राउ गरेको हो ।
फरार कैदी बन्दीहरूलाई सम्पर्कमा आउन प्रशासन र प्रहरीले पटक पटक सूचना मार्फत आह्वान समेत गरेका थिए । उक्त समयमा केही फरार कैदी बन्दी आफै कारागार फर्किएका थिए ।
फरार कैदी बन्दीको खोजीलाई प्रमुखता दिइएको जिल्ला प्रहरी प्रमुख प्रहरी नायव उपरीक्षक वेदबहादुर पौडेलले जानकारी दिनुभयो । फरार भएका कैदी बन्दी कहाँ छन् भनेर खोजी भइरहेको बताउँदै उहाँले महत्त्वपूर्ण सूचना प्राप्त भएको भन्दै उनीहरूलाई पक्राउका लागि प्रहरी टोली खटिएको बताउनुभयो ।
गम्भीर अपराधमा समेत सजाय भोगिरहेका कैदी बन्दी फरार रहेकोले समाजमा आपराधिक गतिविधि बढ्न सक्ने जोखिम समेत छ । जेन–जी आन्दोलनको मौका पारेर देशभरका विभिन्न कारागारबाट हजारौँ कैदी बन्दी जेल तोडेर भागेका थिए ।
