रुकुम पश्चिमको मुसिकोट नगरपालिका वडा नम्बर २, बारिपोले घर भई हाल अमेरिकामा रहनुभएका सुवास खड्काले मुसिकोट १, सल्लेमा रहेको बुद्ध भूमि सेवा आश्रमलाई सहयोग गर्नुभएको छ । जन्मदिनको अवसरमा उहाँले आश्रमलाई खाद्यान्न सहयोग गर्नुभएको हो ।
उहाँको तर्फबाट स्थानीय लक्ष्मण खड्का, सुमन खड्का, पत्रकार मनिष खड्का लगायतले आश्रमका अध्यक्ष खम्बप्रसाद जैसीलाई चामल, तेल लगायतका खाद्यान्न सामग्री हस्तान्तरण गर्नुभयो । जन्मदिनमा हुने खर्चलाई मानव सेवामा प्रयोग गरेको सुवासले बताउनुभयो ।
आश्रममा आश्रय लिएर बसिरहेका व्यक्तिहरूका लागि सानो भए पनि सहयोग पुगोस् भनेर खाद्यान्न सहयोग गरेको उहाँको भनाई छ । साथै उहाँले दुःखमा रहेका व्यक्तिहरूलाई सहयोग गर्न पाउँदा खुसी लागेको बताउनुभयो ।
सामग्री ग्रहण गर्दै आश्रमका अध्यक्ष जैसीले सहयोगी सुवासलाई धन्यवाद व्यक्त गर्नुभयो । यो सहयोगले आश्रममा रहेका आश्रित व्यक्तिहरूको व्यवस्थापनमा महत्त्वपूर्ण टेवा पुग्ने उहाँको भनाई छ । आश्रममा विभिन्न ठाउँका संरक्षण विहीन व्यक्तिहरू बसिरहेका छन् ।
