मलाई हाम्रो पार्टी माओवादी केन्द्रले रूकुम पश्चिम चाैरजहारी नगरपालिकाका नगर प्रमुखको चुनाव लड्नका लागि टिकट दिने निर्णय गर्यो । निर्णय सार्वजनिक भयो । सामाजिक सञ्जाल, फोन र एसएमस मार्फत बधाई तथा शुभकामना आइरहे । मैले टिकट पाउने भएपछि केही विपक्षीले खसी काटेर खुसीयाली मनाएछन् । वादीले टिकट पायो, अब जित्न सजिलो हुन्छ भन्दै खुसीयाली मनाइएछ । ति साथिले म वादी भएको मात्रै देख्नुभए छ । थाहा पाउनु भएछ । मलाई माओवादी भएको चिन्नु, बुझ्नु भएन । उत्पीडित जातिको मुक्तिका खातिर दश वर्ष गौरवपूर्ण जनयुद्ध गरेको गौरवशाली पार्टीको एक सिपाही हुनुका नाताले निल्र्लज्ज गरिएको त्यो हर्कतले थप उर्जा प्राप्त भएको छ । विपक्षीहरुको निश्चित, जाती, वर्गप्रतिको बुझाई थप प्रष्ट भएको छ । 

नेकपा माओवादी केन्द्र चौरजहारी नगरको इन्चार्ज छु । पार्टीको वैकल्पिक केन्द्रीय सदस्य पनि हो । विगतको समन्ती सत्ताले धकेलेर पिधमा पुर्याएको एउटा जाति, समुदायबाट आएको नेताका रुपमा पार्टीले मूल्याङ्कन गरेर नगरप्रमुखका लागि टिकट दिएको हो । पार्टीको यो निर्णयले समग्र चौरजहारीबासी खुसी भएको मलाई लागेको छ । पार्टीका नेता, कार्यकर्ता सिंगो कार्यकर्ता खुसी छन् । यो निर्णयले सबैलाई उत्साही बनाएको छ । स्वःत स्फूर्त प्रचारमा आउनेहरु बढ्नुभएको छ । नगरको सिंगो पार्टी निर्वाचनमा होमिसकेको छ । पार्टी, भातृ तथा भगिनि संगठनहरु निर्वाचनमा लागि सकेका छन् । एक हिसावले जित भइसकेको छ । त्यसको अनुमोदन जनताबाट हुन मात्रै बाँकी छ जस्तो महशुस भइरहेको छ । 

लामो समयदेखिको शोषण, दमन, उत्पीडनबाट जनतालाई मुक्ति गर्न थालिएको जनयुद्धले उत्पादन गरेको नेताका हैसियतले पार्टीले दिएका विभिन्न भूमिमा निर्वाह गरियो । अब अर्को भूमिकाका लागि पार्टी अघि सारेको छ । यो मेरो व्यक्तिगत चाहना कम र पार्टीको चाहना÷निर्णय बढी हो । नगरका सिनियर नेताहरुको जोडबलका कारण यो निर्णय भएको छ । यो पार्टीले दिएको अर्को भूमिका हो । त्यो भूमिका यस अघिका भूमिका जस्तै पूरा गर्न कुनै कसर बाँकी राखिने छैन । अघि नै कुरा भइसक्यो अदारणीय जनता मतदानका लागि आतुर भइसक्नुभएको छ । गाउँ गाउँमा, वडा र टोल, वस्तिमा त्यो माहोल बनेको छ । चौरजहारीमा जसले जे गरे पनि भनेपनि माओवादीको विकल्प छैन । यो पुष्प वादीको कुरा होइन माओवादीको कुरा हो । यो कुरा आम जनताले पनि प्रष्ट बुझ्नु भएकै छ । 

समाजमा हुने विभेदबाट विद्रोही चेत पलाएको थियो । विद्यालयमा गएको समयमा डेस्कमा राखिएको झोला छोइएपछि रोटी छोइदियो भनेर सहकर्मीबाट कुटाई खाएको, पछि उल्टै शिक्षकबाट पनि कुटाई खाएपछि चेत बढेको थियो । त्यही चेतले जनयुद्धमा लामबद्ध बनायो । नेपाल उत्पीडित मुक्ति समाजसँगको भेटघाट र प्रशिक्षणपछि भइरहेको विभेदका बारे प्रष्ट भयो र यसको अन्त्य गर्ने मुख्य शक्ति माओवादी नै हो भन्ने निष्कर्ष सहित पूर्णकालिन भइएको हो । जनयुद्धका क्रममा पार्टीले दिएका विभिन्न मोर्चा, पार्टी र संगठनमा खेलेको भूमिकाले पार्टीलाई मेरो विश्वास छ । जनताप्रति माया छ, जनताले आशा मान्ने अवस्था पार्टीकै कारण बनेको हो । 

२०५७ सालमा जनयुद्धमा पूर्णकालिन भइयो । सोही सालमा पार्टीको भातृ संगठन दलित मोर्चा जिल्ला अध्यक्ष भइयो । त्यतिबेला पार्टीले पार्टी सदस्य मात्रै दिएको थियो । सोही सालमै पार्टीले एरीया समिति सदस्य बनायो । २०६१ सालमा मोर्चाको केन्द्रीय सदस्य, २०६२÷०६३ मा मोर्चाको प्रदेश इन्चार्जको जिम्मेवारीमा पार्टी, संगठनले खटायो । शान्ति स्थापनाछि सल्यान, रुकुम इन्चार्ज, मोर्चाको सचिवालय सदस्य पार्टीको राज्य समिटि सदस्य, २०६८ सालदेखि ४ वर्ष वादी समुदाय उत्थान विकास समितिको संयोजक भएर काम गरियो । त्यो पनि पार्टीको एक मोर्चा थियो । 

रुकुम जिल्लाले वर्गविहीन समाज नमूना अभ्यास गरिरहेको छ । बेला बेलामा भएका निर्णय, घटना, परिघटनाले त्यो पुष्टि गरेको छ । लाभका पदहरुमा पनि समानुपातिक वितरण गर्नेदेखि पार्टीका महत्वपूर्ण जिम्मेवारीमा समेत दलित, उत्पीडित जाति समुदायको सन्दर्भमा रुकुममा नमूना अभ्यास भइरहेको छ । त्यो सफल पनि हुँदै गएको छ । यसको पछिल्लो उदाहरण मध्य म पनि एक हुँ भन्न सकिन्छ । २०७४ स्थानीय तहको निर्वाचनमा पार्टीले २ जनालाई उपप्रमुख बनायो । वडाध्यक्षमा पनि त्यसरी साथीहरु आउनुभयो । प्रदेश सभा तर्फ धेरैमा एक जना मात्रै रातो कामीले निर्वाचन लड्नुभयो । रुकुम जिल्लामै जन्मनुभएका महेश्वर गहतराज संघीय मन्त्री हुनुहुन्छ । कहिलेकाँही केही कुरा नमिल्ने नपुग्ने भएको हुन सक्छ तर आम रुपमा रुकुमको पार्टी नेतृत्वले हाम्रो वर्ग, समाज उत्थानका लागि गरिरहेको छ । 

चौरजहारीमा ५ वर्षको अवधिमा नमूना काम भएका छन् । २०७४ सालमा भएको स्थानीय तहको निर्वाचनमा हाम्रा नेता विशाल शर्मा नेतृत्वको टोली विजयी बनेको थियो । यो कार्यपालिकाले चौरजहारीको विकासका लागि महत्वपूर्ण काम गरेको छ । शिक्षा, स्वास्थ्य, भौतिक पूर्वाधारमा उल्लेखनिय काम भएका छन् । त्यसैको निरन्तरताका लागि अहिलेको टिम आउनुपर्छ । यो चौरजहारीको आवश्यक्ता र जनताको माग हो । जनतासितै रहेर भएका थुप्रै कामका कारण फेरि पनि माओवादी नै रोज्ने वातावरण चौरजहारीमा छ । २०७४ देखि २०७९ सम्मका जनप्रतिनिधिले गरेका कामहरु प्रष्टै देखिन्छन् । यसबीचमा बनाइएका ऐन, नियम र कानूनले सरकारलाई चलाएका छन् । केही नहुने अवस्थाबाट सुरु गरिएको चौरजहारी नगर यहाँसम्म आइपुग्दा थुप्रै स्रोत साधनले सम्पन्न भएको छ । नगर अस्पताल, हरेक वडामा स्वास्थ्य केन्द्र स्थापना, प्रशासनिक भवन निर्माण, सबै वडाका सबै टोलमा सडक सञ्जाल विस्तार भएको छ । यी कुराको पूर्ण हाम्रै पार्टीको सरकारले गरेको छ । अब यसलाई  थप बढाउनु छ । जनताका बढेका आवश्यक्ता परिपूर्ति गर्नु छ । यसैले आम चौरजहारीबासीमा हाम्रो पार्टीको तर्फबाट यो प्रतिबद्धता गर्दछु ।

(कुराकानीमा आधारीत)