रुकुम पश्चिमको आठबीसकोट नगरपालिका वडा नम्बर ५ मा ४ वटा कृषि उपज संकलन केन्द्र निर्माण गर्ने गरी वडाले तयारी थालेको छ । वडाका ४ वटा टोलमा कृषि उपज संकलन केन्द्र बनाई वडाको उत्पादनलाई बजार पुर्याउने गरी वडाले तयारी गरिरहेको छ ।
वडाको गैरीपातल, थापागाउँ, रिम्का र मिग्रीमा गरी ४ ठाउँमा कृषि उपज संकलन केन्द्र निर्माण हुन लागेको वडाध्यक्ष घनश्याम भण्डारीले जानकारी दिनुभयो । संकलन केन्द्रका लागि जग्गा खरिद गर्न यो वर्ष ८ लाख बजेट रहेको उहाँको भनाई छ । ५ वर्षको अवधिमा ४ वटा संकलन केन्द्र निर्माण गर्ने गरी तयारी भइरहेको उहाँले बताउनुभयो ।
उहाँका अनुसार यो वर्ष भने एउटा संकलन केन्द्र बन्न लागेको छ । गैरीपातलमा कृषि उपज संकलन केन्द्रका लागि जग्गा खरिद भइसकेको वडाध्यक्ष भण्डारीले बताउनुभयो । संकलन केन्द्रको भवन निर्माणका लागि समेत बजेट आइसकेको उहाँले बताउनुभयो ।
कर्णाली प्रदेश सरकारबाट कृषि तथा जडिबुटी वहुउद्देश्यीय अनुसन्धान केन्द्र शिर्षक अन्तर्गत नगरपालिकामा प्राप्त बजेट मध्येको ४५ लाख बजेट भवन निर्माणका लागि विनियोजन भएको वडाध्यक्ष भण्डारीले बताउनुभयो । यो बजेटबाट यसै वर्ष संकलन केन्द्रको भवन निर्माण हुने उहाँले बताउनुभयो ।
गाउँमा उत्पादन भएका स्याउ, किवी लगायतका फलफूल, ताजा तरकारी र दुध लगायतका कृषि उपजहरु संकलन गर्ने र उक्त उपजलाई बजारसम्म पुर्याउने गरी संकलन केन्द्र निर्माण हुन लागेको हो ।
वडाध्यक्ष भण्डारीका अनुसार वडामा उत्पादन भएका सबै कृषि उपज संकलन केन्द्रमा जम्मा हुने र उक्त वस्तु नगरपालिकाको गाडीले बजारसम्म पुर्याउने छ । यसका लागि नगरपालिकाले गाडीको समेत व्यवस्था गरिसकेको छ ।
