रुकुम पश्चिमको त्रिवेणि गाउँपालिकाले सबै विषयत क्षेत्रलाई प्राथमिकतामा राखेको छ । गाउँ सभामा सभाध्यक्ष तथा गाउँपालिका अध्यक्ष झक्कुप्रसाद घर्ती मगरले पेश गरेको आगामी आर्थिक वर्षको नीति तथा कार्यक्रममा विषयगत क्षेत्रलाई प्राथमिकतामा राखिएको हो । विकास, निर्माण, समृद्धि र जनताको सुखको लागि हरेक क्षेत्रको महत्व उस्तै भएको भन्दै आर्थिक वर्ष २०७८/०७९ का लागि विभिन्न १३ वटा विषयत क्षेत्रमा केन्द्रीत रहेर नीति तथा कार्यक्रम तय गरिएको छ ।
सामाजिक विकास क्षेत्र, आर्थिक विकास क्षेत्र, पूर्वाधार विकास क्षेत्र, वातावरण तथा विपद् व्यवस्थापन क्षेत्र, अनुगमन, मूल्यांकन तथा निरीक्षण र न्याय कानून सम्बन्धीका क्षेत्रलाई प्राथमिकता निर्धारण गरी नीति तथा कार्यक्रम पारी गरिएको छ । नीति तथा कार्यक्रममा सार्वजनिक सेवा तथा सुशासन, जनप्रतिनिधि तथा कर्मचारी आचारसंहिता, योजना तर्जुमा, कार्यान्वयन तथा लेखा प्रणाली, संघ–संस्था समन्वय तथा परिचालन, बजेट कार्यान्वयन, राजश्व प्रशासन तथा परिचालन, सामाजिक–सांस्कृतिक रुपान्तरण तथा सभ्यताको विकासलाई पनि आवश्यक्ता र महत्वको आधारमा प्राथमिकिकरण गरिएको छ ।
सामाजिक विकास क्षेत्र अन्तर्गत शिक्षा, स्वास्थ्य, रोजगार, बहु क्षेत्रीय पोषण, खानेपानी तथा सरसफाइ, सामाजिक साँस्कृतिक प्रबद्र्धन, खेलकुद मनोरञ्जन, लैङ्गिक समानता तथा समावेशिकरणलाई प्राथमिकतामा राखेर नीति कार्यक्रम बनाइएको छ । आर्थिक विकास क्षेत्र अन्तर्गत कृषि तथा पशु पालन, उद्योग तथा वाणिज्य, पर्यटन विकास, सहकारी र वित्तिय क्षेत्रलाई प्राथमिकता दिइएको छ । पूर्वाधार विकास क्षेत्र अन्तर्गत स्थानीय सडक, सडक पुल तथा झोलुङ्गे पुल, सिचाई, भवन तथा सहरी विकास, उर्जा लघु तथा साना जलविद्युत र सञ्चारको विकासलाई प्राथमिकतामा राखेर नीति तथा कार्यक्रम पारीत गरिएको छ । वातावरण तथा विपद् व्यवस्थापन क्षेत्र अन्तर्गत वन तथा भू–संरक्षण र बाह्य वातावरण निर्माणलाई मुल प्राथमिकता दिइएको छ ।
नीति तथा कार्यक्रममा गाउँपालिकामा दुई वटा नमूना बहुप्राविधिक विद्यालय निर्माण गर्ने र कमाउँदै पढ्दैको वातावरण बनाउने, स्थानीय पाठ्यक्रम निर्माण गर्ने, द्धन्दपीडित, सहिद परिवारलाई पठन पाठनमा सघाउन छात्रावृत्ति प्रदान गर्ने उल्लेख छ । स्वास्थ्य केन्द्रसम्म सहज पहुँच, गाउँपालिकाको अस्पताललाई १५ शैय्या बनाइने, रोग नियन्त्रण गर्न उपचारात्मक, प्रबद्र्धनात्मक, निरोधात्मक कार्यक्रम सञ्चालन गर्ने, अति विपन्न परीवारलाई स्वास्थ्य बीमा बनाइदिने नीति तथा कार्यक्रम पारीत गरिएको छ । विपन्न नागरिक तथा गर्भवतीलाई स्वास्थ्यसम्म निःशुल्क एम्बुलेन्स सेवा दिइने छ ।
सामुदायिक स्तरमा निर्माण हुने योजनामा गाउँपालिकाका १२ सय व्यक्तिलाई सय दिन बराबरको रोजगार प्रदान गरिने छ । प्रत्येक गर्भवती महिलाको घरमा हरियो झण्डा राखिने तथा आमालाई खाना र शिशुलाई नाना कार्यक्रम सञ्चालन गरिने नीति तथा कार्यक्रममा उल्लेख छ । खेलकुदको विकासका लागि हरेक वर्ष त्रिवेणि सहिद स्मृति कप प्रतियोगिता खेलाउने, दहवाङमा कभर्ड हल सहितको खेलमैदान र हरेक वडामा मैदान निर्माण गरिने नीति तथा कार्यक्रममा उल्लेख गरिएको छ ।
जनयुद्ध तथा सहित परिवारका लागि महिनाको एक हजार भत्ता प्रदान गर्ने, त्रिवेणिमा निर्मित सडकहरुको नाम सहिदका नाममा नामाकरण गर्ने, पालिकाभित्रका जेष्ठ नागरिकलाई लक्षित गरी सरकारको नासो कार्यक्रम सञ्चालन गर्ने नीति तथा कार्यक्रममा उल्लेख गरिएको छ । पौरखी हातलाईहरुलाई सरकारको साथ नारा दिएर दश लाखको कोष खडा गर्ने र त्यसको बृद्धि गरी ६० देखि ६९ उमेर समूहका नागरिकको नाममा लगानी गरिदिने, दुग्ध उत्पादनका लागि बैंकबाट ऋण लिने व्यवस्था मिलाइदिने नीति तथा कार्यक्रममा उल्लेख छ । गाउँपालिकाका सडक मर्मत र सफाइका लागि कोष स्थापना, न्युनतम, सडकको ५ मिटरमा घरटहर बनाउन नदिने नीति अख्तियार गरिने र भएकालाई हटाइने, जनयुद्ध, सहिदको त्याग र बलिदानबाट स्थापना भएको गाउँपालिका भएकाले चक्रपथ निर्माणलाई महत्व दिइएको नीति तथा कार्यक्रममा उल्लेख छ ।
1675054956.jpg)
