२०२९ साल माघ १५ गते तत्कालिन बाँफिकोट गाविस वडा नम्बर ३ (हालको रुकुम पश्चिम बाँफिकोट गाउँपालिका ३) स्यानीदहमा आमा सेती खत्री र बुवा सर्वजित खत्रीको जेठा छोराको रुपमा महेन्द्र केसीको जन्म भयो । सानैबाट शालीन र शान्त स्वभावका केसी अहिलेपनि उस्तै स्वभावका हुनुहुन्छ । उहाँको राजनीतिक जिवन तत्कालिन मोटो मसालबाट सुर भएको हो । २०४४ साल जतिबेला पञ्चायत काल थियो तत्कालिन मोटो मसालको विद्यार्थी संगठन अखिल नेपाल राष्ट्रिय स्वतन्त्र विद्यार्थी यूनियनको साधारण सदस्यता प्राप्त गर्नुभयो । २०४७ सालमा पार्टी सदस्यता पाउनुभयो । २०४८ सालमा बहुदल आएपछि उहाँ उक्त विद्यार्थी संगठनको जिल्ला सह सचिव हुनुभयो । त्यसपछि उच्च शिक्षाका लागि उहाँ दाङ झर्नुभयो । महेन्द्र बहुमुखी क्याम्पसमा मानविकी संकायमा अध्यनरत उहाँले दाङमा पनि विद्यार्थी संगठन छाड्नुभएन । त्यहाँ रहँदा उहाँ क्याम्पस इकाई कमिटी अध्यक्ष तथा जिल्ला सदस्य सम्म हुनुभयो । २०५० मा पढाई सकिएपछि उहाँ २०५१ सालमा रुकुम फर्किनुभयो ।
२०५२ मा नेकपा माओवादीले जनयुद्ध सुरु गरे देखि नै उहाँ पूर्णकालिन रुपमा युद्धमा सामेल हुनुभयो । उहाँले पार्टीमा पारसमणिका नाममा संगठकका रुपमा पार्टीमा काम गर्नुभयो । पार्टी संगठन विस्तार तथा निर्माणमा खटिनुभएका उहाँले २ वटा युद्धमा कमिसार भएर नेतृत्व पनि गर्नुभएको छ । उहाँ २०५२ सालमा पार्टीको बाँफिकोट एरियाको सेक्रेटरी हुनुभयो । जिल्ला सदस्य बन्ने अवसर उहाँले २०५४ सालमा मात्र प्राप्त गर्नुभयो । उहाँ जिल्ला सचिवालय सदस्य समेत बन्नुभयो । त्यसपछि २०५८ सालमा उहाँ पार्टीको मगराज राज्य कमिटी सदस्य बन्नुभयो । साथै उहाँले मगराज राज्य कार्यालयमा काम समेत गर्नुभयो । उहाँले २ वटा जिल्लाको इन्चार्ज भएर समेत काम गर्नुभयो । २०६० मा उहाँ गुल्मी जिल्लाको इन्चार्ज हुनुभयो । झण्डै डेढ वर्ष त्यहाँ काम गर्नुभयो । त्यसपछि उहाँ बाग्लुग आउनुभयो । २०६२ मा बाग्लुङ झर्नुभएका केसीले लामो समय त्यहाँ इन्र्चाजसिप गर्नुभयो ।
तर पछि २०६९ सालमा उहाँ प्रचण्ड नेतृत्वको माओवादीबाट मोहन बैद्य, रामबहादुर थापा र नेत्रविक्रम चन्द लगायतका नेता अलग हुँदा उहाँपनि उक्त टिममा सामेल हुनुभयो । पछि २०७४ सालमा उहाँ पुरानै पार्टीमा फिर्ता हुनुभयो । त्यसपछि उहाँले पुनः पार्टीमा रहेर विभिन्न जिम्मेवारीमा काम गर्नुभयो । उहाँ २०७४ पछि पार्टीको कर्णाली प्रदेश सदस्य बन्नुभयो । अहिले उहाँ पार्टीको कुनै जिम्मेवारीमा हुनुहुन्न । उनै महेन्द्र केसी २०७९ मंसिर ४ गते भएको प्रतिनिधि र प्रदेश सभा निर्वाचनबाट कर्णाली प्रदेश सभा सदस्यमा निर्वाचित हुनुभएको छ । रुकुम पश्चिम प्रदेश सभा क बाट नेकपा एमालेका नारायणकुमार शाहलाई १० हजार ९ सय ५२ मतको फराकिलो अन्तरले पराजित गर्दै उहाँ निर्वाचित हुनुभयो । केसीले १९ हजार ३३ मत पाउँदा एमालेका शाहले ८ हजार ८१ मत पाउनुभयो । उनै केसीसंग हामीले विभिन्न समसामयिक विषयमा कुराकानी गरेका छौं । प्रस्तुत छ त्यसको सार संक्षेपः
सबैभन्दा ठूलो कुरा म जनताकै विचमा रहने छु । जनता जसरी वसेका छन् म पनि उनिहरुकै सुख दुःखमा रहने छु ।
आन्दोलनले जन्मायो
आज म जुन अवस्थामा आइपुगेको छु यो मेरो व्यक्तिगत क्षमताले मात्र होइन । माओवादीले संचालन गरेको जनयुद्धले मलाई यो अवस्थामा ल्याइपुर्याएको हो । हामी एउटा आन्दोलनमा सहभागी भयौं र इतिहास रच्ने काम गर्यौं । आज म यो अवस्थामा आइपुग्नुका पछाडी हजारौं सहिदको रगत, पसिना, जनताको त्याग, तपस्या र आन्दोलनले काम गरेको हो । एउटा आन्दोलनले जन्माएको व्यक्ति हुँ म । वर्षौ पछि जनताको सेवा गर्ने स्थानमा आइपुगेको छु । यसको मतलव अहिलेसम्म सेवा नगरेको भन्ने होइन अव संस्थागत रुपमै सेवा गर्ने ठाउँमा पुगेको छु । आवश्यकताले मलाई यो स्थानमा ल्याएको हो भन्न नि रुचाउँछु म ।
जनताको साथ छोड्ने छैन्
धेरै ठूला कुरा गर्छु भनेर अहिले नै भन्दैन् । सबैभन्दा ठूलो कुरा म जनताकै विचमा रहने छु । जनता जसरी वसेका छन् म पनि उनिहरुकै सुख दुःखमा रहने छु । अहिले नेताहरु जनताप्रति उत्तरदायी भएनन्, जनतालाई विर्सिए भन्ने ठूलो गुनासो छ, मेरो हकमा यो गुनासो आउन दिने छैन् । मेरो खटाई जनयुद्धकै जसरी हुने छ । जनयुद्धमा जुन खटाई थियो त्यसमा अहिले सुस्तता आएको छ । अव म त्यसलाई निरन्तरता दिन्छु । जनता भन्दा माथि कोही पनि छैनन् । म कहिले पनि जनता भन्दा माथि सोच्ने गल्ति गर्ने छैन् । म अहिले जसरी नै जनता संगै सामान्य जिवन विताउने छ ।
एउटा पार्टीले मलाई टिकट दिएको भएपनि सबै जनताबाट अनुमोदित भएकाले म साझा हुँ । यसमा कसैले पनि कुनै शंका नगर्नुहोला विकासका लागि म काखा र पाखाको नीति लिने छैन् ।
जनताले ठूलो खोजेकै छैनन्
म निरन्तर जनताको विचमै छु । जनताले धेरै ठूलो केही खोजेकै छैनन् । जस्तो उदाहरणका लागि खानेपानीको मुहानमा समस्या भयो त्यसको संरक्षण र व्यवस्थापनका लागि सानो सहयोग होस भन्ने चाहेका छन्, त्यसमा थोरै सहयोग भयो भने बाँकी काम उनीहरु आफैले गर्न सकिहाल्छन् । यस्ता तमाम स–साना माग छन् जनताका ति माग पुरा गरिदिने हो भने जनता फुरुंग भइहाल्छन् । आवश्यकताका आधारमा म यस्तै यस्तै कुरामा केन्द्रीत हुने छ । जनताले गरेको विश्वासलाई म घात गर्ने छैन् ।
उत्पादनको बजारीकरणमा मुख्य ध्यान दिन्छु
म चुनाव प्रचारका लागि मेरो निर्वाचन क्षेत्रका सबै गाउँमा पुगे । त्यहाँ पुग्दा मैले बजारको समस्या देखेँ । जनताले उत्पादन गरेका छन्, तर त्यसको बजार छैन् । लाखौंको कृषि उपज बजार नपाएर खेर गइरहेको अवस्था छ । मेरो प्रयासले कतिसम्म सकिन्छ म यसमा शतप्रतिशत मेरो बल लगाउने छु । जिल्लाको हकमा स्थानीय हुँदै प्रदेश र संघ सरकारले पनि यसअघि यसमा ध्यान दिइरहेका छन्, तर अव म पनि यसमा जोडिन्छु । मेरो कार्यकालमा कम्तिमा पनि कृषकले उत्पादन गरेको वस्तु बजारसम्म पुग्ने वातावरण बनाउने छु ।
म सबैको साझा हुँ
एउटा पार्टीले मलाई टिकट दिएको भएपनि सबै जनताबाट अनुमोदित भएकाले म साझा हुँ । यसमा कसैले पनि कुनै शंका नगर्नुहोला विकासका लागि म काखा र पाखाको नीति लिने छैन् । मेरा लागि मेरो निर्वाचन क्षेत्रका सबै जनता बराबर हुन्, आवश्यकता आधारमा सबैतिर समानुपातिक विकास हुने छ । सबै जनता मेरा लागि बराबर हुनुहुन्छ । साझा प्रतिनिधिका हिशावले काम गर्दै सबैको मन जित्ने प्रयास गर्ने छु । हामीले धेरै कुरा चुनावी प्रतिवद्धतामा राखेका छौं । धेरै काम सामुहिक रुपमा हुने छन् भने मेरो क्षेत्रमा यहाँको आवश्यकताका आधारमा थप केही नयाँ काम पनि हुने छन् ।
नव निर्वाचित कर्णाली प्रदेश सभा सदस्य महेन्द्र केसीसंग गरिएको कुराकानीको सारसंक्षेप ।
