रुकुम पश्चिमको त्रिवेणी गाउँपालिकाले आगामी आर्थिक वर्ष २०८२/०८३ का लागि नीति तथा कार्यक्रम ल्याएको छ । सोमबार १३ औं गाउँसभा बैठकमा गाउँपालिका अध्यक्ष गणेशकुमार केसीले आगामी आर्थिक वर्षका लागि नीति तथा कार्यक्रम प्रस्तुत गर्नुभएको हो । सामाजिक क्षेत्र अन्तर्गत शिक्षा, स्वास्थ्य, खानेपानी सरसफाइ, सामाजिक तथा सांस्कृतिक प्रवद्र्धन, सामाजिक सुरक्षा लगायतका क्षेत्रलाई समेटिएकाे निनी तथा कार्यक्रम प्रस्तुत गर्नुभएको हो ।
सामाजिक सुरक्षा कार्यक्रमलाई व्यवस्थित बनाउन कोष देखी शोक सम्म कार्यक्रम संचालन गरिने निती तथा कार्यक्रममा उल्लेख छ । जसमा बच्चा जन्मिदा स्वास्थ संस्थामा पुर्याउन निशुल्क एम्बुलेन्स सेवा र अति विपन्न नागरिकलाई मृत्यु संस्कारमा वडाको सिफारिसमा विपद शाखा मार्फत ३ हजार रुपैयाँसम्म आर्थिक सहयोग गराइने छ । बजार व्यवस्थापन तर्फ झुल्नेटा र सिम्रुतु बजार क्षेत्रमा दायाँबायाँ २ मिटरको पैदल मार्ग निर्माण गरी पैदल यात्रीलाई सहज आवातजावत वातावरण मिलाइने छ । सडकमा हाँस, कुखुरा छोड्ने निर्माण सामग्री सिमेन्ट, बालुवा, ढुङ्गा, गिट्टी फाल्ने सडकमा फोहोर फाल्ने जो कोहिलाई १० हजार जरिवाना गरिने निती तथा कार्यक्रममा उल्लेख छ ।
त्यस्तै खेलकुद तर्फ एक वडा एक खेलकुद मैदान निर्माण गरिने, गाउँकार्यपालिका, वडा कार्यालय, विषयगत शाखा, विद्यालय, कृषि शाखा, पशु शाखा, स्वास्थ्य शाखामा आवश्यक पर्ने जनशक्ति सुनिश्चित गरी आवश्यकताभन्दा बढी भएका कर्मचारी शिक्षकलाई कटौती गरिने छ । राजस्व उत्कृष्ट तरिकाले संकलन गर्ने र कार्यसम्पादनमा राम्रो गर्ने वडा तथा शाखा कार्यालयलाई पुरस्कृत गरिने, निःशुल्क रूपमा जग्गा प्राप्त गर्ने वडाहरुलाई भवन निर्माणका लागि पहिलो प्राथमिकतामा राखि आगामी ५ वर्ष भित्र गाउँपालिकाका सबै वडा तथा कार्यालयहरुकाे आ–आफ्नै भवन निर्माण गरिने छ । औपचारिक र अनौपचारिक क्षेत्रका श्रमिकहरुलाई योगदानमा आधारित सामाजिक सुरक्षा कोषमा आवद्ध गरिने गरी आगामी आर्थिक वर्षबाट ५ वर्ष सेवा अवधि पुरा भएका कार्यालय सहयोगी र सवारी चालकहरुबाट कामको थालनी गरिने गाउँपालिका अध्यक्ष केसीले प्रस्तुत गरेको निती तथा कार्यक्रममा उल्लेख गरिएको छ ।
सहिद परिवार तर्फ सहिदका छोराछोरीलाई शिक्षा र रोजगारीका अवसरमा प्राथामिकता दिइने, घाइतेहरुको निःशुल्क उपचार गर्ने र छोराछोरीलाई निःशुल्क शिक्षाको व्यवस्था गरिनुका साथै निशुल्क स्वास्थ्य विमा गरिनेछ । महिला तर्फ प्रत्येक गर्भवती महिलाको घरमा हरियो झन्डा राख्ने आमालाई खाना र शिशुलाई नाना कार्यकमलाई प्राथमिकता दिइनेछ ।
कर संकलनमा ‘‘कतै छोडिदैन र कहिँ लुटिदैन“ भन्ने मान्यतालाई आत्मसाथ गर्दै, निर्धारण गरीएका आन्तरीक आम्दानीका स्रोत र क्षेत्रवाट शतप्रतिशत राजस्व संकलन गरिनेछ । भूगोल तथा विशेष रुपमा नागरीकलाई प्रत्यक्ष सहभागी बनाई संकलन गरिएका योजनाहरुको आवश्यकताका आधारमा छनौट गरी त्रिवेणी गाउँपालिकामा योजना निर्माण सम्पन्न गरी सरकारी तथा गैरसरकारी क्षेत्रवाट समेत सोही योजना बैंङबाट मात्र योजना कार्यन्वयन गरिने परिपाटीको व्यवस्था गरिने त्रिवेणी गाउँपालिकाले प्रस्तुत गरेको निती तथा कार्यक्रममा उल्लेख गरिएको छ ।
सोमबार निती तथा कार्यक्रम ल्याएको गाउँपालिकाले आज आगामी आर्थिक वर्षको बजेट ल्याउने गाउँपालिकाले जनाएको छ ।
